سەقایێ سار و بارانی وەكهەڤی ل سەر دهۆكێ و نەسرا ئیماراتی سەپاند
د سەقایەكێ سار و بارانی دا تیما فوتبۆلا یانەیا دهۆك دگەل مێڤانا خوە یانەیا نەسر یا ئیماراتی ب دو گۆلان وەكهەڤ بوو، د یارییا واندا ئەوا ل شەڤا دەربازبووی ل یاریگەها دهۆك ژ چارچووڤەیێ گەڕا سێیێ یا كۆما ئێكێ ژ قارەمانیا كۆپا كەنداڤی هاتیە كرن.
دگەل دەستپێكرنا نیڤا ئێكێ هەردو تیم ب شێوەكێ هۆشداری هاتنە دناڤ یاریگەهێ دا، دگەل بۆرینا دەمی ئاستێ یاریێ بەر ب گڤاشتنا ل سەر گۆلا هەڤدۆ دچوو تایبەت یاریزانێن مێڤان گڤاشتنێن باشتر دكرن، ژلایێ خوەڤە ژی یاریزانێن دهۆكێ ژی هێرشێن هەڤدژ ل سەر گۆلا نەسرێ هەبوون، ل سەر گڤاشتنێن بەردەوام پیشەكارێ دهۆكێ یانیك زاكێری گۆلا ئێكێ دخولەكا 26ێ دا تۆماركر، پشتی ڤێ گۆلێ یاریزانێن نەسر بزاڤێن راستڤەكرنا ئەنجامێ یاریێ دكرن و چەند لڤینەكێن مەترسی ل سەر گۆلا دهۆكێ پەیداكرن، دەمێ مایی چ ژ ئەنجامی نە هاتە گوهۆڕین ئەوا ب پێشكەفتنا ئەلهۆیێن چیا ب دووماهی هاتی.
نیڤا دویێ ب ئاستەكێ باشتر و ئاگرین دەستپێكر، تیما مێڤان دەست ب گڤاشتنان كر ژبۆ گۆلا وەكهەڤیێ و ڤەگەڕیان بۆ ناڤ سەقایێ یاریێ و شیان ل سەر ڤێ پلانێ مفایی ژ پەنەلتیەكێ وەربگرن ئەوا د خولەكا 53 دا ژلایێ عەلی مەبخۆت ئەلهاجەری گۆلا وەكهەڤیێ ب سەركەفتیانە ئینای، تۆماركرنا گۆلا وەكهەڤیێ وەكر ئاستێ یاریێ دژوارتر لێبهێت و هەردو یانەیان بزاڤێن هێرشێن هەڤدژ هەبوون دگەل گوهۆڕینا پلانێن یاریێ ژلایێ راستێ بۆ چەپێ و بەرۆڤاژی، هەرچەندە د ماوەیێ هەردو نیڤان دا سەقایێ بارانی و سەرمایێ كارتێكرنا خوە ل سەر جەستەیی و ئاستێ یاریزانان دكر، دخولەكا 76 دا پیشەكارێ بەرازیلی یێ یانەیا نەسر گلاوپەر سانتۆس لیما ب سەری گۆلا دویێ و پێشكەفتنێ بۆ تیما خوە ئینا، لێ یاریزانێن دهۆكێ نە راوەستیان و بێ ئۆمێد نەبوون هەتا خولەكا 90 دەمێ پیشەكارێ پێكگهۆڕ ئەكوا رۆبێن شیایی گۆلا دویێ و وەكهەڤیێ بۆ تیما دهۆكێ بینت، سەرباری زێدەكرنا هەشت خولەكێن دی لێ ئەنجامێ یاریێ ب 2-2 وەكو خوەما ب وەكهەڤییا هەردو تیمان.
بڤی ئەنجامی تیما یانەیا دهۆك ب پێنج خالان ل رێزا دویێ دهێت و نەسر ب حەفت خالان سەرێ لیستێ دهێت، زەفار دو خال هەنە رێزا سێیێ و ئەڤرۆ دێ یارییا خوە بەرانبەر ئەهلی سەنعا كەت ئەوا بێ خال رێزا چارێ دهێت.
بۆ زانین هەشت یانە پشكدارن و هاتینە بەلاڤكرن ل سەر دو كۆمان، یاریێن وان ب شێوەیێ خول دو قۆناغ دهێنە ئەنجامدان و دێ بەردەوامبن هەتا 25ێ نیسانا سالا 2025ێ، یارییا بهێت یا دهۆكێ دێ ل 3-12- 2024 بیتە مێڤانا نەسر یا ئیماراتی كو دبیتە قۆناغا دویێ ژ كۆپا كەنداڤی.
