سەلاحەدین سیابەند بوو سەرۆكێ فدراسیۆنا فوتبۆلا كوردستانێ
دوهی د ڕیورەسمەكێ بەرفرەهـ دا ل هەولێرا پایتەخت دەستنیشانكرنا سەلاحەدین سیابەند وەكو سەرۆكێ فدراسیۆنا فوتبۆلا كوردستانێ ل جهێ تارق عەبدولرەحمان دانا.
سەردار ئیسماعیل ڕێڤەبەرێ گشتی یێ وەرزشی ل هەرێما كوردستانێ گۆت: ب فەرمی سەلاحەدین سیابەند وەكو سەرۆكێ فدراسیۆنا فوتبۆلا كوردستانێ ل جهێ تارق عەبدولرەحمان هاتە دەستنیشانكرن، ئەڤ گوهۆڕینە د پرۆسیسەكا بەردەوامە ل سەر پرانییا دامۆدەزگەهێن وەرزش دا دێ هێنە كرن، تارق عەبدولرەحمان بۆ ماوەیێ چار وەرزان ب شێوەیەكێ گەلەك باش كارێ خو بڕێڤە برییە، پێنەڤێت گوهۆڕێن پێنگاڤەكا ئاساییە پێخەمەت پێشڤەچوونا ئاستێ وەرزشێ و كارێن باشتر بهێنە كرن.
هەروەسان ناڤهاتی گۆت: ئەوێن دهێنە جهێن دەستەكا پێشتر یا فدراسیۆنێ دێ بنە درێژەپێدان بۆ كار و چالاكیێن وان، دگەل داخوازا سەركەفتنێ بۆ یێن نوو دكەین، پێنەڤێت دەمێ بهێت دا دێ دەست ب دانانا ژڤانان بۆ هەلبژارتنێن یانەیان ژی هێنە كرن تایبەت ئەوێن ئەڤە چەندین سالە هەلبژارتن نەكرین، ئەم پشتەڤانین بۆ هەر پێنگاڤەكا پێشئێخستنا وەرزشێ.
بۆ زانین ژ پارێزگەها دهۆكێ ب تنێ ئێك كەس وەكو ئەندام بۆ فدراسیۆنا فوتبۆلا كوردستانێ هاتییە دەستنیشانكرن ئەو ژی سەلاح ئیبراهیم سەرۆكێ پێشتر یێ یانەیا ئاكرێ ل جهێ ئازاد محەمەد كو هەر ئەو وەكو نوونەرێ پارێزگەها دهۆكێ بوو د ناڤ فدراسیۆنێ دا.
