سەلاح بەردەوامە ل سەر شكاندنا ڕیكۆردان
ب شێوەكێ بەرچاڤ محەمەد سەلاح ستێرێ یانەیا لیڤەرپۆل چەند ڕیكۆردێن نوو دناڤا خولا پلا نایابا ئنگلتەرایێ دا پریمەر لیگ دا شكاندینە، پشتی ل شەڤا دەربازبووی سەركەفتنەكا گرنگ ل سەر یانەیا مانچستەر ستی ئینایی ب دو گۆلان بێ بەرانبەر شیابوو گۆلەكێ بینت و ئێكێ ژی بۆ هەڤالێ خوە بەرهەڤبكەت، ژ چارچووڤەیێ گەڕا 26ێ و تیما وان ب جووداهییا 11 خالا ژ نێزیكترین هەڤڕكا خوە ئارسنالێ دووركەڤیت و سەرێ لیستێ پارێزیت.
ل دووڤ تۆڕا سكۆاكا یا ئنگلتەرایێ ئەوا تایبەت بۆ كۆمڤەكرنا ڕیكۆردا دیار كر، محەمەد سەلاح دبیتە ئێك یاریزان د خولا ئنگلتەرایێ دا زێدەتری 40 ئەسیست گۆلان د دو وەرزێن ژێكچوودا، ل وەرزێ 2017-2018 ب گشتی 42 گۆل و ئەسیست هەبوون، د وەرزێ ئەڤسالە دا ڕیكۆرد شكاند بەری ب دووماهی هاتنا خولێ و شیایە 41 گۆل و ئەسیست بینیت، سەلاح ئێكەم یاریزانە د دیرۆكا خولا ئنگلتەرایێ دا گۆلان و ئەسیست دژی خودانا ناسناڤی د یاریێن هاتن و چوونێ دا بینیت، سەلاح ئێكەم یاریزانە زێدەتر 25 گۆلان دگەل 15 ئەسیست د خولا ئەنگلتەرایێ دا بینت، سەلاح 16 گۆل ژ دەرڤەیی یاریگەها خوە ئیناینە كو دبیتە ڕیكۆردەكا نوو د خولا ئنگلتەرایێ دا، هەرچەندە هەمان ڕێژە هاری كین و كێڤن فلیبسی ژی هەبووینە لێ هێشا 12 یاری ژ دووماهی هاتنا خولێ ماینە.
