سەلیم جبوری:ئەم دژی ریفراندۆمێ نینین و دێ رێزێ ل ئیرادا خه‌لکێ كوردستانێ گرین
ئەڤرۆ نیۆز،زنار تۆڤی:
ئه‌ڤرۆ چارشەمبێ شاندێ كوردستانێ بۆ پرسا ریفراندۆمێ ل به‌غدا ل گه‌ل سه‌لیم جبوری سه‌رۆكێ پەرلەمانێ عێراقێ كۆمبووینه و د وێ كۆمبوونێ دا سه‌رۆكێ په‌رله‌مانێ عێراقێ دوپاتی ل هندێ كریه،كو ئه‌و وه‌كو په‌رله‌مان دێ رێزێ ل ئیراده و بۆچوونێن گه‌لێ كوردستانێ گرن.
هەروەسا د وێ كۆمبوونا شاندێ كوردستانێ ل گه‌ل سه‌لیم جبوری دا،کو ناڤهاتی ئاماژه ب هندێ ژی دایه،کو ئەو رێزێ ل هه‌لویست و بۆچوونێن گه‌لێ كوردستانێ د‌گرن،کو ب رێیا ریفراندۆمێ پرسا مانێ و سه‌ر‌بخۆبوونێ ل 25 ئیلۆنێ ئێکلایی د‌كه‌ن.
دیسا سه‌رۆكێ پەرلەمانێ عێراقێ دوپاتی ل هندێ ژی كریە،کو وه‌كو په‌رله‌مان هیچ پێنگاڤەکێ بۆ دژایه‌تیا كوردستانێ ناگرنه‌به‌ر و په‌رله‌مان ب ئێکچاڤ تەماشەی هه‌موو عێراقیان دکەت و باوەری ژی ب ئامرازێن دیمۆكراسیێ هه‌نە بۆ ده‌ربرینا بۆچوونێن خەلکێ ب رێیا ریفراندۆمێ ل هه‌ر دەڤەرەکێ.
ل ئێڤاریا رۆژا دوشه‌مبی 14 تەباخێ شاندێ كوردستانێ گه‌هشتینه به‌غدا و ل‌گه‌ل حه‌یده‌ر عه‌بادی سه‌رۆك وه‌زیرێن عێراقێ كۆمبووینە و ل رۆژا سێشه‌مبی ل گه‌ل بالیۆزێن ئه‌مریكا و تورکیا و ئێرانێ و عه‌مار ئه‌لحه‌كیمی و فوئاد مه‌عسوومی سه‌رۆک كۆماری عێراقێ كۆمبووینه،ئەڤرۆ ژی ئێكه‌م كۆمبوونا خوە ل گه‌ل سه‌رۆكێ پەرلەمانێ عێراقێ ئەنجامدایە.
