سەمایا ئۆپۆزسیۆنێ ب ئاوازێن عەشیرەتگەریێ
غیاس خـالد زێباری
جڤاكێ كوردستانێ ل عەشیرەتا پێك هاتیە، ئەڤ عەشیرەتە ژی خودان داب و نەریتێن خوە یێن تایبەتن، لەوما تشتەكێ نۆڕماڵە جار جار گرژی و ئاڵۆزی دناڤبەرا واندا پەیدا ببن، لێ پێدڤی یە بۆ هەمی گرژی و ئاڵۆزیێن وان، قانوون سەروەر بیت و دەستهەڵات دەستهەڵاتا حوكمەتێ بیت، ژلایەكێ دیتر پێدڤی یە دەستهەڵات رێزێ ل كلتوور و داب و نەریتێن جوانێن عەشیرەتا بگریت و هەردوو ئالی پێكڤە كار ل سەر نەهێلانا خالێن نەرێنی بكەن ئەوێن نەگونجایی ل گەل ڤی سەردەمی، چونكی هەمی پێكڤە كلتوورەكێ نشتیمانیێ كوردستانی پێك دئینن . هەبوونا چەكی د دەستێ عەشیرەتان دا ئێكە دیاردێن كرێن و پێدڤی نەهێلانێ، .سەرهەڵدانا گرژی و ئاڵۆزیێن د ناڤبەرا عەشیرەتا د كەڤندا هەبوونە، لێ ب عەقل و كلتوورێ كەسایەتیێ جڤاكی زوو دهاتنە چارەسەركرن و دبوویە جهێ دلخوەشیا لایەنێن ناكۆك و یێن دەوروبەر، ئانكۆ هەمی ئالی كارئەكتەرێن خێرێ بوون، ئاها ئەڤەیە سەنگ و بەشێ ئەرێنیێ عەشیرەتگەریێ یێ رێگر ل تەشەنەكرنا ناكۆكی و ئاریشەیان. بەری چەند رۆژا دەمێ ئاریشەیەكا بچوك د ناڤبەرا دو عەشیرەتان سەرهەلدای و حوكمەتا هەرێمێ هەوڵا چارەسەریێ بۆ دكر، دبن كاریگەریا سۆشیال میدیایێ و راگەهاندنا هندەك ئالیێن سیاسی یێ خوە ب ئۆپۆزسیۆن دزانن، بابەت زێدەی قەبارێ خوە مەزنتر كر و كرە بابەتەكێ سیاسی و شەرێ د ناڤبەرا عەشیرەتەكێ و حوكمەتا هەرێمێ و پارتیا دەستهەڵاتدا، ژلایەكێ دیتر راگەهەندنا هندەك حزبا و كەسایەتیان ل جهێ رۆلێ ئاگر ڤەمراندنا بگێرن، ب دەستەكی پەنزین هەلگرت و ب دەستەكی بزۆتك، بۆ خوەشكرنا ئاگرێ فتنێ، د وان دو سێ رۆژێن گرژیێن د ناڤبەرا وان هەردو عەشیرەتاندا دیاربوو كو دوژمێنێن ناڤخوە یێن هەرێما كوردستانێ ل دوژمێن دەركی سیار و بەرهەڤتر بۆ شەرێ ژناڤبرنا قەوارێ هەرێما كوردستانێ، بێ كو هزر بكەن نەمانا هەرێمێ نەمانا وانە، ئەگەر مەرەما وان ئەو نەبیت ب چ مەرەم شەرێ دو بنەماڵا دێ هندە مەزن كەن و هەوڵا سەرهەڵدانەكا دژی حوكمەتا هەرێمێ دەن، یان ب شەرەكێ دژی پارتیا دەستهەڵاتدار و هێزێن ناڤخوە كەنە هێزێن پارتیەكێ، ژلایەكێ دیتر ڤان رۆژا زەڵالتر دیار بوو، كو مەژیێ ژمارەكا لایەنێن سیاسی یێن كوردستانێ و هندەك كەسایەتیێن عەشیرەتگەری یێ ڤاڵایە ل هەستا نەتەوی و نشتیمانی و ئارامی و سەقامگیریا كوردستانێ و بەرژەوەندێن گشی . خۆشبەختانە دنگێ بۆقێن وان دناڤ گوهێن خەلكیدا نەما و تیب ب سینگێ تیرهاڤێژی كەفتەڤە، ئاگر ب رۆلێ كەسایەتێن نشتیمان پەروەر و پارێزەرێن وەڵاتیان ب ساناهای هاتە ڤەمراندن و هەردو ئالیێن ئاریشێ ل پڕنسیپێن خو یێن نشتیمانی و ئالیێن جوانێ عەشیرەتیێ دەرنەكەفتن و ب سەروەریا قانوونێ ڕازی بوون و هەلگرێن بزۆتكا شەرمەزار كرن .
لێ پێدڤی یە حوكمەتا هەرێمێ پەندا ل ڤێ ئاریشێ وەربگریت و بۆ هەر ئاریشەیەكا دیتر ب قانوونەكا دادوەرانە سەرەدەریێ ل گەل ئاریشا بكەت بەری بهێنە تەشەنەكرن و قانوونا قەدەغەكرنا چەك هەلگرتنێ ل سەر هەمی كەسان بجهبئینیت و وەزارەتا رەوشەنبیری ژی ب پێرابوونێن قانوونی راببیت بەرامبەر كەناڵێن راگەهاندنێ و سۆشیال میدیایا تێكدەر.
