سەما دلی
ڕۆژا مزووری
ل ناڤ گولێن سۆر و زەر،
ل بن چیایێ بێدەنگ و خەملین،
ل بەر ڕویبارێ بۆش و پڕبێژ؛
من ژ گیانێ تە کۆمکرن
هیڤی و ئەڤین،
ڤەمراندن هەمی ئاگر
كرنە بشكۆژ تەڤ كەڤنە پەل
هیڤی و ئەڤین،
هنداڤ من بوون ئەسمانەك گەش
كرن خۆشی خەم و كەسەر…
هیڤی بوون چەنگێن فڕینێ،
ئەڤینێ گەشکر دێمێ شەرمینێ؛
مە ژیان ژ بۆ ئێك دوبارە ڤەژاند،
نەخۆشی لادان و گری خەندقاند
ب دەستێن خۆ ئاڤدان گولێن ڤیانێ،
ل باغێ مە نەمان ستری؛
ژ من نەپرسە دیرۆکا کەڤنار،
ڤین دوبارە ببیت…
دیرۆك بن ئاخ دبیت.
ئازادی ژ ڕابۆرییێ تۆزگرتی و تاری،
ژیان دێ بیتە شەمال و هنگڤین؛
ژ تبلێن دەستان ئێشان دهەلکێشا،
زمانێ دو لێڤا… دەنگێ سروشتی
زانینا گەردوونی ژ هەناسەیا دزێت،
دبینم هەلبەست، دبینم فەرهەنگ؛
دناڤبەرا مە دا هزار سال و وەرز،
لێ مە نەدیتن، ئەم بووینە دلبەست
شەڤگێڕێ هەیڤێ نەما ل من خویا،
جاران بەرزە دبیت، ل من ناپرسیت؛
ڕۆژ هەلات و ڕۆژ ئاڤا بوو،
ڕۆژەکا نوییە و…
ل من پەیدا نەبوو، ل من پەیدا نەبوو.
