سەمیر عەبدولقادر: ژبەر خرابیا رەوشا ئابووری د بیت پشكداریێ د قۆناغا دویێ دا نەبین
رەمەزان زەكەریا:
د داخویانیەكێ دا سەرۆكێ یانەیا بەردەڕەش ئاشكراكر تیما وان یا تەپا پێی ل قۆناغا ئێكێ یا خولا پلە دو یا كوردستانێ شیا ب ئەنجامێن باش دەربازبیتە قۆناغا دویێ وەكۆ خودانا سەرێ لیستەیا كوما خوە، لێ ئاریشەیا بەردەواما دگەل یانەیێ دهێت خرابیا رەوشا ئابووریە.
زێدەتر سەمیر عەبدولقادر بۆ ئەڤرۆ گۆت: نوكە یانەیا بەردەڕەش بەرهەڤیا دكەت بۆ دەستپێكرنا یاریێن قۆناغا دویێ یا خولا پلە دو یا كوردستانێ و بریارە ئێكەم یاریا خوە بەرامبەر یانەیا شێلادزێ ئەنجام بدەین و بریارە ل ڤێ قۆناغێ یانەیا بەردەڕەش نەهـ یارییان ئەنجامدەت هەر یاریەك ل جهەكێ و سەر یاریگەهەكێ.
ناڤبری گۆت: ئەگەر رەوش بڤی رەنگی بیت وەكۆ نوكە یانەیا بەردەڕەش تێدا دەرباز دبیت مەترسی هەیە نەشێت قۆناغا دویێ تەمام بكەین ژبەر خرابیا رەوشا ئابووری ژبەركو ل ڤێ قۆناغێ یانەیا بەردەڕەش سێ یاریێن خوە دێ ل پارێزگەها سلێمانیێ ئەنجام دەت ئەڤە ژی بۆ یانەیێ بارگرانییەكا مەزنە كو نەشێت هەمی خەرجیێن یانەیێ دابینبكەت.
سەمیر عەبدولقادر گۆت: ئاستێ تیما مە گەلەك یا باشە و هەر ئەو ستافە كو قۆناغا ئێكێ شیای سەرێ لیستێ بگریت هەتا دووماهیێ، لێ ئەڤ جارە مەترسیەكا مەزن هەیە كو ژبەر خرابیا رەوشا ئابووری نەشێت بەردەوامیێ بدەت سەركەفتنێن خوە ل خۆلا پلە دوا كوردستانێ .
