سەنتەرێ چاندنا مەژیێ هەستی بۆ نەخۆشێن تالاسیمیایێ ل دهۆكێ دێ هێتە ئاڤاكرن
ئەڤرۆ
دهۆك، لەزگین جوقی:
رێڤەبەرێ سەنتەرێ ژین یێ نەخۆشیا تالاسیمیایێ ساخلەمیا دهۆكێ دیار كر، رۆژا جیهانیا نەخۆشیا تەلاسیمیایێ ل دهۆكێ هاتە ساخكرن و دبێژیت: ل پارێزگەها دهۆكێ هزار و 161 نەخۆشێن تالاسیمیایێ هاتینە تۆماركرن، ژ وان ژی 73 نەخۆش بۆ دەرڤەی وەلاتی هاتینە هنارتن، داكو مەژیێ هەستی بۆ بهێتە چاندن، نوكە ژی حوكمەتا هەرێما كوردستانێ دێ هەژمارەكا دی یا نەخۆشان هنێریتە دەرڤەی وەلاتی.
د. حەسەن عەبدوللا، رێڤەبەرێ سەنتەرێ ژین یێ نەخۆشیا تالاسیمیایێ ل ساخلەمیا دهۆكێ بۆ ئەڤرۆ خویا كر، دوهی 8/5/2023ێ ب چالاكیەكێ رۆژا جیهانیا نەخۆشیا تالاسیمیایێ ل پارێزگەها دهۆكێ هاتە ساخكرن و گۆت: «نوكە ل پارێزگەها دهۆكێ هزار و 161 نەخۆشێن تالاسیمیایێ هاتینە تۆماركرن، هەموو جۆرێن خزمەتێن ساخلەمیێ بۆ وان دهێنە دابینكرن، وەكو: پێشكێشكرنا خوینێ بۆ نەخۆشان دەمێ پێدڤی دبن و دەرمانێن پێدڤی و ئەنجامدان هەموو جۆرێن پشكنینان بۆ وان». گۆتژی: «هەتا نوكە 73 نەخۆشێن تالاسیمیایێ بۆ دەرڤەی وەلاتی هاتینە هنارتن و مەژیێ هەستی بۆ هاتیە چاندن، دیسا 134 نەخۆشێن دی ژی دبەرهەڤن، كو مەژیێ هەستی بۆ بهێتە چاندن، ئەو ژی بۆ دەرڤەی وەلاتی دێ هێنە هنارتن».
ناڤهاتی ئاشكرا ژی كر، حوكمەتا هەرێما كوردستانێ هەموو جۆرێن هاریكاریان و پشتەڤانیێ ل نەخۆشێن تالاسیمیاێ دكەت و گۆت:»ل پارێزگەها دهۆكێ سەنتەرێ چاندنا مەژیێ هەستی بۆ نەخۆشێن تالاسیمیایێ دهێتە ئاڤاكرن، ئەڤە ژی دێ باشترین خزمەت پێشكێشی نەخۆشان كەت».
