سەندیكا هونەرمەندێن كوردستانێ سالڤەگەڕا خوە ساخكر
شاكر ئەتروشی:
ب هەلكەفتا بۆرینا (41) سالان ل سەر دامەزراندنا سەندیكا هونەرمەندێن كوردستانێ، دوهی ئێڤاری 2/1 ل بارەگایێ سەندیكا هونەرمەندێن كوردستانێ/لقێ دهۆك، پێشوازی ل مێهڤانان هاتە كرن و هژمارەكا زۆرا هونەمەند و هونەردوست و رۆژنامەڤانان ب مەرەما گەهاندنا پیرۆزباهیان سەرەدانا سەندیكایێ كرن.
هونەرمەند (ئەڤین حسێن) سەرۆكا سەندیكا هونەرمەندێن كوردستانێ/لقێ دهۆك، د داخۆیانیەكێ دا بۆ رۆژژنامەیا ئەڤرۆ گۆت: ژبەركو سالڤەگەڕا سەندیكا مە یا هەڤدەمە ل گەل چالاكی و ئاهەنگێن سەڕێ سالێ و د دەه رۆژێن بۆری دا پتریا ئەندامێن مە مژوولی وان چالاكیان بوون مە وەك دەستەیا سەندیكایێ پێ باش بوو ئەڤرۆ بتنێ پێشوازیا مێهڤانان بكەین، لێ مە چالاكیەك بۆ ڤێ هەلكەفتێ بەرهەڤكریە و ل چەند رۆژێن بهێن دێ ئەنجام دەین.
هەروەسا گۆت: بۆ سالا نوو (2024) مە باشتر خوە بەرهەڤكریە بۆ هندەك چالاكیێن دی و هیڤیا مە ئەوە ئەم هەموو پێكڤە ژبۆ هندێ كاربكەین باشتر خزمەتا هونەر و هونەرمەندێن خوە بكەین و دێ بزاڤێ مە دبەردەوام بن بۆ ب دەستڤەئینانا هەموو مافێن وان یێن هونەری، ب تایبەت ژی پاراستنا بەرهەمێن وان ل دووف یاسایێ.
