سەیدایێ خۆشبیت ل ھەیڤا رەمەزانێ دێ هێته په‌خشكرن
ئه‌ڤرۆ نيوز:
سەیدایێ خۆشبیت ئێکە ژ وان درامایێن ئەڤ سالە ھاتیە بەرھەمئینان ل دھوکێ و ل ھەیڤا رەمەزانا پیرۆز ل وار تیڤی دێ ھێتە نیشاندان و لدۆر ڤێ درامایێ شاھین کیڤۆرک کو ئەکتەرەکێ سەرەکیە تێدا بۆ رۆژناما ئەڤرۆ دبێژیت:ئەڤ درامایە ل ناڤا باژێرێ دھوکێ و ھەروەسا ل گوندێ باخرنیفکێ ل پشت بەنداڤا دھوکێ و ھندەک دیمەن ژی ل باژێرێ ھەولێرێ ھاتینە وێنەکرن و گۆت ژی:نێزیکی 40 ئەکتەران پشکداری دڤێ درامایێ دا کریە و ناڤەرۆکا ڤێ درامایێ ل سەر وان روودان و کێم و کاسیانە یێن کو دناڤ جڤاکێ مەدا ھەین و رووددەن،
لەورا ب رێیا ڤێ درامایێ مە ھەولدایە ئەم ڤان کێم و کاسیا دناڤ خۆدا نەھێلین و مە مەرەم پێ ئەوە کو ئەم رەوشت و تیتالێن ئەرێنی نیشا خەلکێ خوە بدەین دڤێ درامایێ دا،وەکی خوینداری و تۆلڤەکرن ئێدی دناڤ جڤاکێ مەدا نەمینیت و ھەروەسا ھەکە کور و کچەک حەز ژ ئێکدو بکەن،کو مافێ وانە بگەھنە ئێک و شۆ ب ئێک بکەن و گۆت ژی:دیسا لایەنەکێ دی یێ ڤێ درامایێ ئەوە کو خەلکێ مە ب نەتەوەیا خوە ڤە بھێتە گرێدان و ھەستا نەتەوایەتی ل نک ھەبیت، ھەروەسا ھەکە ئەم بشێین ب رێژەیا 20% کارتێکرنێ ل خەلکێ بکەین،ئەو مە کارەکێ مەزن یێ ئەنجامدای،یا گرنگ ئەوە کو ئەم نامەیەکێ بگەھینینە مللەتێ خوە،کو ئەم ھەمی د ھەڤکاربین دگەل ئێک بۆ ئاڤاکرنا ڤی وەلاتی،من گەلەک پێ خۆشە ئەز ھەردەم خزمەتا وەلاتێ خوە بکەم،شاھینی خۆیاکر ژی:ھەکە ھاریکاری و پشتەڤانی ھەبیت ژلایێ جھێن شۆلەژێ ئەم دێ شێین کارێن باش ئەنجام دەین کو بەرێ خەلکێ خۆ بدەینە درامایا کوردی و بەرێ وان ژ دراما بیانی وەرگێرین ،لەورا ئەو پارێ لڤان زنجیرَین دۆبلاژکری دھێنە مەزاختن ھەکە ل درامایا کوردی بھێتە مەزاختن دێ گەلەک باشتر بیت،چونکی ئەو زنجیرێن بیانی تشتێن نەباش و نەشایستە د ئینیتە دناڤ جڤاکێ مەدا .