شاره‌زایه‌كێ ئابووری: پێدڤیه پشته‌ڤانیا خودانكارێن پیشه‌سازیا ده‌ستی بهێته كرن
ئه‌ڤرۆ، ره‌مه‌زان زه‌كه‌ریا:
وه‌لاتیه‌كێ ده‌ڤه‌را بارزان ده‌مێ چه‌ندین سالایه دناڤ مالا خوه دا ب ئامێر و كه‌ره‌سته‌یێن گه‌له‌ك ساده كارگه‌هه‌كا بچووكا كارێن ده‌ستی دانایه و ساتۆرا د مالدا دروست دكه‌ت و خواسته‌كا باش ل سه‌ر هه‌یه. شاره‌زایه‌كێ ئابووری ئاشكرا دكه‌ت كو كارێن پیشه‌سازیا ده‌ستی پێدڤی ب پشته‌ڤانیێ هه‌یه بۆ وێ چه‌ندێ كارێن وان ببن ئه‌گه‌ر بۆ باشتركرنا ره‌وشا ئابووریا تاك و جڤاكی و باشتركرنا ژێرخانا ئابووری.
حسێن مسته‌فا، وه‌لاتیه‌كێ ده‌ڤه‌را بارزانه خودان پێشه‌سازیا ده‌ستی یه بۆ ئه‌ڤرۆ گۆت: به‌ریا چه‌ند سالا من ئێكه‌م ساتۆر ل مال دا دروستكر، ئه‌و چه‌نده بوو ده‌ستپێكه‌ك كو پتر گرنگیێ ب كارێ خۆ بده‌م. سه‌ره‌رای جهێ منی كاری گه‌له‌ك یێ بچوویكه، به‌لێ د بوارێ كاركرنێ دا من نه‌خش و دیزان به‌رفره‌هكرن و ل دووڤ را من هژماره‌كا ساتۆرا فرۆتن، پتر حه‌زا كاری و دروستكرنا ساتۆرا ل ده‌ف په‌یدا بوو، هه‌تا گه‌هشته راده‌یه‌كی وه‌لاتی داخوازا دروستكرنا ساتۆرا بكه‌ن بۆ وان دروست بكه‌م.
حسێن گۆت ژی: بهایێ ساتۆرێن من یێ جۆدایه، هه‌ر كێره‌یه‌ك ب بهایه‌كێ دهێته فرۆتن و ژ 300 دۆلارا بۆ پتر ژ هزار دۆلارا دهێنه فرۆتن و خواسته‌كا باش لسه‌ر هه‌یه، به‌لێ پیشه‌سازیا كارێن ده‌ستی پێدڤیی ب پشته‌ڤانییه‌كا باش هه‌یه بۆ وێ چه‌ندێ مفاداربوون ژ تاكی ده‌ركه‌ڤیت و جڤاك هه‌موو مفا دار بیت .
تاهر سالح، شاره‌زایێ ئابووری بۆ ئه‌ڤرۆ گۆت: ل هه‌موو ولاتان پێشه‌سازیا كارێن ده‌ستی هه‌یه، ل كوردستانێ ژی ده‌مێ چه‌ندین سالایه وه‌لاتی ب تنێ كار دكه‌ن، به‌لێ پێشه‌سازیا ده‌ستی پێدڤی ب پشته‌ڤانیێ هه‌یه، بۆ وێ چه‌ندێ ئابووریا وه‌لاتی پتر گه‌شه بكه‌ت و جڤاك پتر مفای ژێ بینیت. هه‌رده‌ما پشته‌ڤانیا پێشه‌سازیا كارێن ده‌ستی هاته كرن، وی ده‌می دێ جهێ كاركرن ل ناڤ مالدا بنه كارگه‌هـ و ده‌لیڤێن كاری پتر بن و ئابووریا وه‌لاتی گه‌شه كه‌ت و هه‌موو مفاداربن ژ پێشه‌سازیا ده‌ستی، ژبلی كو چه‌ندین كه‌سێن دی ژی دێ فێری كارێن ده‌ستی بن.
