شازادە و دندكا كێلیكێ
نڤیسین:
هانس كریستیان ئەندرسۆن*
وەرگێڕان ژ زمانێ عەرەبی: خالد سالح
هەبوو نەبوو، د چاخێ بەرێ دا شازادەیەك هەبوو، دڤییا شازادەیەكێ بۆ خۆ بینیت، لێ شازادەیەكا ب راست بیت. لەوما رابوو ل جیهانێ گەڕییا دا شازادەیەكا هۆسا ببینیت. لێ ئەڤ چەندە یا ب ساناهی نەبوو، چونكی گەلەك شازادە هەبوون، لێ ئایا ئەو شازادە د راست بوون.؟! ئەڤە ئەو بوو یا نەدشییا ژێ پشتراست بیت، هەردەم هندە سەروبەر هەبوون كو ل دوماهیێ مرۆڤ گۆمانێ ب بەتێ. و گەلەك ب خەم ڤەگەرییا وەلاتێ خۆ ڤە چونكی هیڤیێن وی بۆ ژنهینانێ ب شازادەیەكا ژ راست گەلەك د مەزن بوون.
د شەڤەكێ دا سەقا گەلەكێ ب ترس بوو، گڕگڕا ئەسمانی بوو و برووسی ڤەددان و باران ب شپی د هات، ب راست شەڤەكا ب ترس بوو! هند های ژێ بوون دەرگەهێ باژێری یێ دهێتە لێدان و پادشاهێ پیر رابوو دا دەرگەهی ڤەكەت.
شازادەیەك یا ل بەر دەرگەهی راوەستیایە، لێ د كاودانەكێ بێ سەروبەر دابوو؛ ژ بەر بارانێ و سەقایێ باڕۆڤەیی.! چپكێن ئاڤێ یێن ژ پرچ و جلكێن وێ دكەڤن، و ئەو پێ ئاگەهداركرن كو ئەو شازادەیەكا ب راستە.
– «دا ببینین، دا ژ سەروبەری پشتراست ببین!»
شاژنا پیر هزرێن خۆ كرن لێ چ نە گۆت، چوو د ژۆرا نڤستنێ ڤە، ڕویێن هەمی لحێفك و دۆشەكێن داگرتی ژێڤەكرن و رابوو ب دانانا دندكەكا كێلیكێ ل بنێ تەختی و پاشی هات بیست دۆشەك هینان و دانانا سەر دندكا كێلیكێ و بیست لحێفك ژ پەرێن كەردیكلكا دانانا سەر، و ل سەر شازادەیێ ئەوە ل سەر بنڤیت.
ل سپێدەیێ پرسیار ژێ كرن كا یا رەحەت بوو د نڤستنا خۆ دا.!
شازادەیێ گۆت: «ئۆی، ئەز ئێكجاری نە نڤستم!»..، «ها نێزیكە ب درێژاهییا شەڤێ ب ئێكجاری چاڤێن من نە كەتنە سەرێك! خودێ د زانیت چ د ناڤ نڤینان دا هەبوو؟ ئەز دبێژم ئەز ل سەر تشتەكێ ڕەق نڤستبووم، لەشێ من یێ پری پنیێن شین و زەرە بووی! سەروبەرەكێ دژوارە!»
ب ڤێ چەندێ ژێ پشتراست بوون كو ئەو شازادەیەكا ب راستە دەمێ هەست ب دندكا كێلیكێ كری د سەر بیست دۆشەك و بیست لحێفكا را. پیستێ كەسەكێ وەسا یێ هەستیار نابیت ئەگەر شازادەیەكا ب راست نەبیت.
وەسا شازادەی ئەو بۆ خۆ كرە ژن دەمێ زانی شازادەیەكا ب راستە، و ئەو دندكا كێلیكێ ئێخستنە د ناڤ مۆزەخانا پادشاهی دا ل قەسرێ و هەتا نهو تو دشێی ببینی ئەگەر كەسێ نە بربیت و ها ئەڤە من بۆ هەوە چیرۆك وەكی هەی گۆت.
* نڤیسەر و هەلبەستڤانەكی دانیماركییە ل سالا 1805 ژ دایك ببوو و ل سالا 1875 مر.
ئەڤ چیڕۆكە ل سالا 1835ێ هاتییە نڤیسین.
ژێدەر/ قصص وحكایات خرافیە، هانس كریستیان أندرسن
ترجمە: دنی غالی
سال: 2005ێ
