شاشیا لێدانا بوریا په‌ترولا هه‌رێمێ. .. یان هوشداری !
كریارا تیرورستی یا پرسوسێ ( سرۆجێ) ل باكورێ كوردستانێ وه‌كو چریسكا چه‌ند ئاگران هاته بكار ئینان، و یا دیاره چه‌ند لایه‌نان خوه بو هه‌لكرنا ڤی ئاگری به‌رهه‌ڤ كربوو، pkk ێ پرسوسێ كره به‌هانه و بناڤێ تولڤه‌كرنێ هێرش كره سه‌ر پولیسێن توركیا، توركیا پرسوس كره خالا وه‌رچه‌رخانێ و هاته دناڤ شه‌رێ داعشێ دا كو هه‌تا نها ب ئالیگرێ داعشێ دهاته تومه‌تباركرن، ژلایه‌كێ دی توركیا هێرشا ئه‌سمانێ بو سه‌ر باره‌گایێن PKK دناڤ ئاخا هه‌رێما كوردستانێ دا ده‌ست پێكرن، هه‌تا ڤێرێ هه‌ڤكێشا سیاسی ل ده‌ڤه‌رێ یا دیاره و به‌رژه‌وه‌ندیێن توركیا وئیرانێ وئه‌مریكا. .. و حزبێن كوردستانی ب تایبه‌ت PDK و PKK و PUK . .. . تێدا دهێنه خاندن.
لێ ده‌ما گروپه‌كێ PKK هێرشی بوریا په‌ترۆلا هه‌رێما كوردستانێ بكه‌ت، ئارمانج وخاندن تێكه‌ل دبن، خوه‌یایه بوریا په‌ترولێ یا كو ب بوریا ژیارا خه‌لك و حكومه‌تا هه‌رێما كوردستانێ دهێته هژمارتن نه تنێ بوریا پارتی یه، و ژ داهاتێ وێ ژیارا 85% یا خه‌لكێ كوردستانێ دهێته دابین كرن، به‌هانه‌یا لێدانا ڤێ بوریێ ژی نا هێته قه‌بوول كرن نه ژلایێ خه‌لكێ كوردستانێ ڤه ونه ژلایێ پارتێن سیاسی هه‌تا ئه‌و پارتێن ب لاگرێن PKK دهێنه نیاسین، و ب ئاشكه‌رایی ب گونه‌ه هاته هژمارتن.
پرسیار ل ڤێرێ ئه‌ڤه‌یه. ئه‌رێ PKKێ ب شاشی ڤه ئه‌ڤ كریاره كریه؟ هه‌ر وه‌كی د به‌یانامێ دا هاتی كو گروپه‌كێ سه‌ر ب وان ڤه بێی را وه‌رگرتنا سه‌ركردایه‌تیا خوه ئه‌ڤ كریاره كریه، ئه‌گه‌ر هوسا بیت، دهێته باوه‌ركرن كو گروپێن سه‌ر ب PKK هند دوربن ژ دیسپلینا حزبی كو بێی سه‌ركردایه‌تیا خوه كریاره‌كا هوسا بكه‌ن.
یان راسته نه زانی یه كو ئه‌و بوریا په‌ترولێ یا كو هاتیه لێدان بوریا په‌ترۆلا هه‌رێما كوردستانێ یه، ئه‌گه‌ر هوسا بین ئه‌رێ دناڤبه‌را زاخۆ وسلۆپی دا چ بوریێن دی یێن په‌ترولێ تێدا ده‌رباز دبن ژبلی بوریا هه‌رێما كوردستانێ؟
یان ژی یا راست ئه‌وه كو PKK زانیه كو بوریا كوردستانێ یه و زانیه دێ نه‌رازی بوون ژی ژێ په‌یدا بن ودبیت هنده‌ك ژ لایه‌نگریا خوه ژی ژ ده‌ست بده‌ن، و ئه‌گه‌ر پێتڤی كربا دبیت داخوازا لێبوورینێ ژی بكه‌ت، لێ وان ڤیایه هوشداریه‌كێ بده‌نه كاربده‌ستێن هه‌رێما كوردستانێ و بتایبه‌ت پارتی كو ئه‌گه‌ر ئاگر به‌ربوو رێلی دێ ته‌ر وهشك پێكڤه سوژن، و نه خه‌لكێ كوردستانێ دێ یێ ته‌نا بیت هه‌روه‌كی كریارا گوندێ زه‌رگه‌لێ و شه‌هیدكرنا سڤیلان نیشادای ، و نه به‌رژه‌وه‌ندی و خوه‌شگوزه‌رانیا خه‌لكی وداهاتێ هه‌رێمێ دێ یێ پاراستی بیت. .. له‌ورا دڤێت هه‌رێما كوردستانێ بزانیت ئه‌گه‌رPKK بڤێت ره‌وشێ تێك بده‌ت دێ شێت گه‌له‌كێ كه‌ت و ئه‌ڤ كریاره نه شاشی بو به‌لكو نامه‌كا هوشداریێ بوو نه زێده‌تر.