شام ناهێلیت فرۆکەخانەیا قامشلۆ بهێتە بکارئینان
بەرپرسەکێ رێڤەبەریا خوەسەر یا رۆژئاڤایێ کوردستانێ دیار کر، پشتی ژناڤچوونا رژێما بەشاری وان چەندین جاران داخواز ژ شامێ کرینە کو رێ بدەت دا فرۆکەخانەیا نێڤدەولەتی یا قامشلۆ دەست ب کارێ خوە بکەت و وەلاتی بشێن ب رێیا فرۆکەخانەیا قامشلۆ هاتنوچوونێ بکەن، ژ بۆ ڤێ یەکێ ژی لیژنەیەک تایبەت هاتبوو پێکئینان دا کارێن خوە بکەن، لێ جارەکا دی شامێ ئاستەنگی دروست کرن و نها دانوستاندنێن ل گەل شامێ بەردەوامن.
وەزارەتا ڤەگۆهاستنێ یا سووریێ ژی دیار کریە، دەستهەلاتا فرۆکەخانەیا قامشلۆ د دەستێ وان دایە و ئەو دێ چاڤدێریا کاروبارێن فرۆکەخانەیێ کەن و نابیت رێڤەبەریا خوەسەر وێ فرۆکەخانێ بێی رازیبوونا شامێ بکار بینیت.
هەژی ئاماژەپێدانێ یە کو فرۆکەخانەیا قامشلۆ پشتی ژناڤچوونا رژێما بەشاری هەموو کارێن وێ هاتینە راگرتن و بەری نها هندەک جاران فرۆکەیێن سەربازی یێن رۆسیا فرۆکەخانە بکار دئینان و نها رێڤەبەریا خوەسەر دڤێت فرۆکەخانە بکەڤیتە د خزمەتا خەلکی دا و شام ژی ئاستەنگان دروست دکەت.
