شانده‌كێ به‌رپرسێن توركيا دێ چيته ئه‌مريكا
ئه‌ڤرۆ نيوز:
ژێدەرێن دبلۆماسی ئەڤرۆ رۆژا سێشەمبی راگەھاندن کو شاندەکێ بەرپرسێن تورکیا ژبۆ دانوستاندن و چارەکرنا ھەڤرکیێن د ناڤبەرا ھەردو وەلاتان دا، دێ د دو رۆژێن داھاتی دا سەرەدانا ئەمریکا کەن.
پەیوەندیێن د نابڤەرا ھەردو وەلاتان دا ژ بەر ھەڤرکیێن دەربارەیی سوریا و گرتنا قەشەیێ ئەمریکی برونسۆن ب تۆمەتا پشتەڤانیکرنا تیرۆرێ ژ لایێ تورکیا ڤە ئالۆز بووینە.
ھەر وەسا ژ لایەکێ دی ڤە سزادانا ھەردو وەزیرێن ناڤخۆ و داد یێن تورکیا ژ لایێ ئەمریکا ڤە ل ھەمبەر بڕیارا واشنتۆن و بڕیارا ھەڤشێوێ وێ یا ئەنقەرە بۆ سزادانا ھەردو وەزیرێن ناڤخۆ و داد یێن ئەمریکا پەیوەندیێن ناڤبەرا ھەردو لایان ئالۆز کرینە.
ژێدەرێن دەنگوباسان بەحس ل وێ چەندێ ژی دکەن کو سزادانا دو وەزیران وەکو دەسپێک د ناڤبەرا ئەمریکا و تورکیا دا، ل ھەڤکرنەک ھاتیە پێش و د دو رۆژان دا شاندەکێ ئەنقەرە دێ سەرەدانا واشنتۆن کەت.
تەوەرێن کۆمبوونێ ژی دێ بەحسکرن بیت ل سەر رەوشا ئالوزیێن تورکیا و ئەمریکا و ب تایبەت ژی تەوەرێ قەشێ ئەمریکی و سزادانا وەزیرێن ھەردو وەلاتان.
ئالوزیێن ناڤبەرا ھەردو وەلاتان بووینە ئەگەرێ داکەفتنا بھایێ لیرێ تورکی د بازارێن جیھانێ دا کو کارتێکرنەکا مەزن ل ئابوورێ تورکیا کریە ب رەنگەکی 100 دۆلارێن ئەمریکی نوکە د بەرامبەرن ب 540 لیرێن تورکی.
