شاندێ ئیمرالیێ دێ چیتە دەف ئۆجەلانی
سڕی سۆرەیا ئۆندەر ئەندامێ شاندێ ئیمرالیێ بۆ دەزگەهێن راگەهاندنا تورکیا دیار کر پشتی هەڤدیتنێن وان ل گەل پارتێن سیاسی یێن ل پەرلەمانێ تورکیا ب دووماهی بهێت ئەو دێ سەرەدانا سەلاحەدین دەمیرتاش هەڤسەرۆکێ بەرێ یێ هەدەپێ ل زیندانێ کەن و دێ گۆهداریا نێرینێن وی سەبارەت ب قۆناغا نوو یا ئاشتیێ ل تورکیا کەن.
ناڤهاتی ئەو یەک ژی دیار کر پشتی هەڤدیتنێن وان ب دووماهی بهێن ئەو دێ جارەکا دی چنە ئیمرالیێ و دێ ل گەل عەبدوللا ئۆجەلانی کۆمبن و دێ دیتنا هەموو هێزێن سیاسی یێن تورکیا گەهیننە ئۆجەلانی و هەروەسا دێ راپۆرتەکێ ژی سەبارەت ب ئەنجامێ هەڤدیتنان بۆ رایا گشتی ئاشکرا کەن.
ل ئالیێ دی دەزگەهێن راگەهاندنا تورکیا ژی دیار دکەن نها بەرهەڤی بۆ ڤێ یەکێ دهێنە کرن دا ل ئاهەنگا نەورۆزێ ل ئامەدێ پەیامەکا ئۆجەلانی بۆ رایا گشتی بهێتە خواندن کو دهێتە چاڤەرێکرن ئۆجەلان د پەیاما خوە دا داخواز ژ پەکەکێ بکەت دەست ژ چەکی بەردەت.
