شاندەكێ ئیتالی دێ هەژمارەكا نشتەرگەریێن دلی بۆ زارۆكان ل دهۆكێ ئەنجام دەت
دهۆك، لەزگین جۆقی:
رێڤەبەریا گشتی یا ساخلەمیا پارێزگەها دهۆكێ دیار كر، شاندەكێ ئیتالیا سەرەدانا رێڤەبەریا گشتی یا ساخلەمیا پارێزگەها دهۆكێ كر و ژ لایێ د. ئەفراسیاب موسا، رێڤەبەرێ گشتی یێ ساخلەمیا پارێزگەها دهۆكێ ڤە پێشوازی لێ هاتە كرن، چەندین كۆمبوون گەل بەرپرسێن نەخۆشخانێن دهۆكێ ئەنجامدان، بۆ دیتنا باشترین رێكێن هاریكاریێ ژ بۆ چارەسەركرنا نەخۆشان.
ساخلەمیا پارێزگەها دهۆكێ راگەهاند: «پشكەكا سەرەدانا شاندێ ئیتالی ئەو بوو، هەژمارەكا زارۆیێن تووشبوویێن نەخوشیێن دلی یێن زكماكی بهێنە دیتن، ژ لایێ تیمەكێ تایبەتمەند ڤە یێ رێكخراوا هیڤی، نۆشدارێن تایبەمەندێن نەخوشیێن دلی تێدابوون، دۆرێن 100 زارۆیێن تووشبوویێن نەخۆشیێن دلی هاتنە پشكنینكرن، ب سەرپەرشتیا د. فرانشیسكو سانتورۆ ڤە، هەژمارەكا نەخۆشان هاتنە دەستنیشانكرن بۆ ئەنجامدانا نشتەرگەریێن نەخوشیێن دلی و ئەنجامدانا پشكنینا قەستەرا دلی، د پاشەرۆژەكا نێزیك دا».
