شاندەكێ وەبەرهێنەرێن سعوودیێ دێ سەرەدانا هەرێما كوردستانێ كەت
زنار تۆڤی:
پەیڤدارێ دەستەیا وەبەرهێنانێ ل هەرێما كوردستانێ دیار كر، نوكە ئەم بەرهەڤیان دكەین بۆ هاتنا شاندەكێ بلندێ وەلاتی سعوودیێ بۆ هەرێما كوردستانێ ب مەرەما ئەنجامدانا پڕۆژەیێن مەزن و دروستكرنا هێلەكا ئەسمانی بۆ هنارتنا بەرهەمێن ناڤخوەیی یێن هەرێما كوردستانێ بۆ وەلاتێ سعوودیێ.
بەرگەشت ئاكرەیی، زێدەتر بۆ رۆژناما ئەڤرۆ گۆت: «بریارە شاندەكێ بلندێ وەلاتێ سعوودیێ و كۆمپانیێن وەبەرهێنانێ یێن وی وەلاتی، كو نێزیكی 60 كەسانە سەرەدانا هەرێما كوردستانێ بكەن، وەزیرێ وەبەرهێنانا سعوودیێ دێ سەرۆكاتیا وی شاندی كەت، نوكە ئەم یێ بەرهەڤیان دكەین بۆ هندێ دەمێ ئەو شاندە دهێتە هەرێما كوردستانێ هەژمارەكا دیداران ل گەل حكومەتێ و وەبەرهێنەرێن هەرێمێ و ژوورێن بازرگانی و پیشەسازی یێن هەر چار پارێزگەهێن هەرێمێ ئەنجام بدەن، لەوما ئەم ژی بەرهەڤیێن باش دكەین، هەتا كو دهێنە هەرێما كوردستانێ، چونكی مە كۆمەكا پڕۆژەیێن مەزن بەرهەڤكرینە د سێكتەرێن پیشەسازی و ئاكنجیبوونێ و چاندنێ دا، ئەگەرەكێ زۆر هەیە وەبەرهێنەرێن سعوودی چەندین هەڤبەستێن بازرگانی ل كوردستانێ ئەنجام بدەن، دیسا ب هاتنا وی شاندی دێ پەیوەندیێن ئابووری و بازرگانی ل گەل وەلاتێ سعوودیێ بهێز ئێخین».
ناڤهاتی گۆتژی: «مە دڤێت ئەو وەبەرهێنەرێن دهێنە هەرێما كوردستانێ پڕۆژێن مەزن و یێن هەڤپشك ژی ئەنجام بدەن، مە پێشنیارەك ژی كریە، كو هێلەكا ئەسمانی د ناڤبەرا هەرێما كوردستانێ و سعوودیێ دا بۆ هنارتنا بەرهەمێن ناڤخوەیی یێن هەرێما كوردستانێ بهێتە ڤەكرن، هەروەسا وەلاتێ سعوودیێ دێ پڕۆژێ ئاڤا ئیفرازێ ل هەولێرێ ب شێوێ قست چێكەت و دێ هاریكاریا هەرێما كوردستانێ كەت د ڤی واری دا، دیسا بریارە سەنتەرەكێ مەزن یێ ب بازاركرنا بەرهەمێن ناڤخوەیی، ب تایبەتی ژی د بیاڤێ چاندنێ دا ل هەولێرێ بهێتە دامەزراندن و كارگەهەكا داگرتنا فێقی دێ هێتە چێكرن و بەرهەمێن جۆتیارێن هەرێما كوردستانێ دێ هێنە رەوانەكرن بۆ وێ كارگەهێ و پاشی دێ هێنە رەوانەكرن بۆ وەلاتێ سعوودیێ، هەروەسا سەرۆكێ حكومەتا هەرێما كوردستانێ هەردەم ڤیایە ژێرخانا ئابووری ل هەرێما كوردستانێ بهێز بێخیت».
