شانۆڤانه‌ك: ژ بلی سترانبێژێن مللی چو هونه‌رمه‌نده‌كێ دی ل كوردستانێ ب داهاتێ هونه‌ری ناژیت
ئه‌ڤرۆ، ره‌مه‌زان هه‌رنی:
هونه‌رمه‌ندێ شانۆڤان هامنۆ شه‌ریف، د دیداره‌كێ دا بۆ رۆژناما ئه‌ڤرۆ گۆت: شانۆ ب خوه په‌یامه گه‌هاندنا راستیانه ب بینه‌ران، راسته هه‌تا نوكه وه‌ك پێدڤی شانۆ ل كوردستانێ ناهێته نیشاندان ئه‌ڤه ژی دزڤریت بۆ ده‌زگه‌هێن په‌یوه‌ندیدار و حوكمه‌تێ كو كێم خه‌م بووینه به‌رامبه‌ر شانۆیێ ل كوردستانێ، هونه‌ر هاتیه ژبیركرن ب تایبه‌ت شانۆ ل گه‌ل وێ چه‌ندێ كو ده‌رچوویێ په‌یمانگه‌ها كومپیوته‌ری مه، به‌لێ من به‌رده‌وام كار د ناڤ بوارێ هونه‌ری دا كریه، ل گه‌ل ڤێ هه‌موو بێ پشته‌ڤانیا ل كوردستانێ هه‌ی بۆ بوارێ هونه‌ری شانوڤانێن كوردستانێ رانه‌وه‌ستیاینه ل پرانیا باژێر و باژاروكێن كوردستانێ شانۆ هاتینه نیشاندان”.
ناڤهاتی گۆت: “هه‌تا نوكه من پشكداری د هژماره‌كا شانۆگه‌ریان دا كریه و رۆل تێدا دیتیه، هنده‌ك جاران ژی وه‌ك بجهكار و رێڤه‌به‌رێ شانۆیێ و كارێ مۆزیكێ من كار كریه، شانویا كوردی نوكه د قووناغه‌كا باش دایه و پێشڤه‌چوونه‌كا باش ب خوه ڤه دیتیه، ژ به‌ر كو ده‌رهێنه‌ر و شانۆڤانێن باش هه‌نه، به‌لێ مخابن ل كوردستانێ رێڤه‌به‌رێ به‌رهه‌مه‌كێ شانۆیێ ب خوه ب دووڤ سپونسه‌را بگه‌ریێت داخوازا هاریكاریێ بكه‌ت، ژ بلی سترانبێژێن مللی چو هونه‌رمه‌نده‌كێ دی ل كوردستانێ ب داهاتێ هونه‌ری ناژیت”.
ل دووماهیێ هامنۆی گۆت: “رێژا هونه‌رمه‌ندان د ومی ئاستی دا نینه كو به‌حس لێ دهێته كرن، ئه‌گه‌ر رێژه‌كا مه‌زن یا هونه‌رمه‌ندان هه‌بیت كا كارێن وان، ئه‌و كارێن دهێن ئه‌نجامدان ژماره‌كا كێمن ل ئاستێ هونه‌رێ بلند كاردكه‌ن هژمارا هونه‌رمه‌ندان پیڤه‌ر نینه، به‌لكو بۆ هونه‌ری ئاست و كار و ره‌وشه‌نبیریا هونه‌رمه‌ندان پیڤه‌ره”.
