شانۆیێ ئازادیا وێ ژێ وەرگرتیە
ئەڤرۆ، رێوار محەمەد رەشید:
چاوان خەلیل، ئەکتەرەکا پارێزگەھا ھەلەبجە یە د دیدارەکێ دا بۆ بەرپەرێ ھونەری یێ رۆژناما ئەڤرۆ دیار کر کو دەمێ زارۆ حەزا کارێ ھونەری ل دەف وێ پەیداببوو ژ بەر کو د ناڤ مالباتەکا ھونەری دا رابوویە و دایکا وێ ژی شانۆکار بوویە و ژ بەر ڤێ چەندێ ژی دەمێ قوتابی ل قووناغێن سەرەتایی و ناڤنجی پشکداری د چالاکی و شانۆگەریێن قوتابخانێن خوە دا دکر و ھەر ژ بەر ڤێ حەزێ بەشێ شانۆیێ ل پەیمانگەھا ھونەرێن جوان و کۆلیژا ھونەرێن جوان ل ھەولێرێ ب دووماھی ئینایە و گۆت: “بەری بچمە پەیمانگەھا ھونەرێن جوان من ل گەل تیپا کۆمەلا ھونەرێن جوان ل ھەلەبجە کارێ شانۆیێ ئەنجام ددا و ھەتا نوکە ژی ل سەر ھەمان کار یا بەردەوامم، سەرەرایی کارێ شانۆیێ ھەتا نوکە من وەکو ئەکتەر پشکداری د فلمێن سینەمایی و درامایان ژی دا کریە، بەلێ من چوجاران کارێ ئەکتەریێ د کلیپان دا نەکریە”.
ناڤھاتیێ ئاماژە دا وێ چەندێ کو شانۆ بۆ وێ ئەو جھە یێ کو بشێت خوە تێدا گونجینیت و ھەمان کار حەزژێکرنا ھندەک کەسان پێشکێشی وێ کر، بەلێ شانۆیێ ب تایبەتی ل حەلەبجە ئازادیا وێ ژێ وەرگرت و گۆت: “د کارێ خوە یێ شانۆیێ دا ئەز بەھرا پتر حەز ژ وان رۆلان دکەم یێن بەرۆڤاژی من بۆ وێ چەندێ ئەز بشێم شیانێن خوە تێدا دیار بکەم، بەلێ گەلەک جاران ھندەک رۆل بمن ھاتینە دان من رەتکرینە، ژ بەر کو ل گەل کەسایەتیا من نەگۆنجاینە”.
چاوانێ خویا کر کو ژ بلێ کارێ شانۆیێ وێ کارێن دوبلاژێ ژی ئەنجامدایە و ل سالا ٢٠١٦ێ ب پێشکێشکرنا بەرنامەکێ زارۆیان ل کەنالێ (کورد ماکس) ھاتیە د ناڤ کارێ راگەھاندنێ ژی دا و نوکە وەکو پێشکێشکارا بەرنامەکێ ھونەری ب ناڤێ (مێھڤان) ل کوردستان تیڤی کاردکەت و ھەتا نوکە چەندین خەلەکە ب مێھڤانداریا چەندین ھونەرمەندێن ناڤدار ژ ڤی بەرنامەی پێشکێشکرینە و گۆت: “ئەز د کارێ خوە یێ شانۆیێ دا سەرکەفتی ترم ژ یێ راگەھاندنێ، چونکو شانۆ حەزا من یا ئێکێ بوو”.
