شانیایێ حەز ژ دەفێ نەدكر
سولین سلێمان:
شانیا، كو نێزیكی سێ سالانە دەفێ دژەنیت، د دیدارەكێ دا بۆ رۆژناما ئەڤرۆ دبێژیت: ل دەستپێكێ من چو حەز بۆ هونەری نەبوون، لێ پشتی من پشكداری د خۆلەكێ دا كری حەزا هونەری ل دەف من پەیدا بوو، هەروەسا ژ نشكەكێ ڤە ئەز بۆمە ژەنیارا دەفێ، لێ نوكە یا دلخۆشم.
هەروەسا گۆت: ل دەستپێكێ من وەسا هزر دكر كو دەف ئامیرەكێ دەنگ بلندە و پتر بۆ رەگەزێ نێر دگونجیت، لێ پشتی من دەستپێكری حەزەكا زێدەتر ل دەف من چێبوو، نوكە دەف هەڤالا من یا هەردەمە و ژبلی دەفێ ئەز دزانم چەندین ئامیرێن دی ژی بژەنم، وەك (دائیرە و كاخۆن، بەندیر و دهۆل) بۆ زانین دەمەكە ئەز ل گەل چەند مۆزیكژەنان مژوولی ئامادەكرنا چەند پارچە مۆزیكەكێن فولكلۆری ینە و هیڤیا من ئەوە دباشبن و هیڤیا من ژ هەموو خێزانان دەلیڤێ بدەنە كچێن خوە یێن خودان بەهرە دا بهێن رۆلێ خوە دناڤ هونەری دا ببینن.
