شرۆڤه‌كاره‌ك: مه‌رج نینه حوكمه‌تا ئیراقێ ژلایێ ره‌وتێ سه‌دری ڤه بهێته پێكئینان
هه‌ولێر، قائید میرۆ
پشتی په‌یاما موقته‌دا سه‌در سه‌رۆكێ ره‌وتێ سه‌دری مه‌ترسی یا هه‌ی كو ئالۆزیێن زێده‌تر بكه‌ڤنه هه‌مبه‌ر پڕۆسا پێكئینانا حوكمه‌تا نوو یا ئیراقێ و شرۆڤه‌كاره‌كێ سیاسی ژی دبێژیت، مه‌رج نینه حوكمه‌تا نوو ژلایێ ره‌وتێ سه‌دری ڤه بهێته پێكئینان و مه‌زنترین لیستا په‌رله‌مانی دێ هێته چێكرن بۆ پێكئینانا حوكمه‌تا نوو.
ئاراس عه‌بدولا، شرۆڤه‌كارێ سیاسی بۆ رۆژناما (ئه‌ڤرۆ) گۆت”راسته موقته‌دا سه‌در په‌یامه‌ك لدۆر ده‌ستێوه‌ردانێن ده‌ره‌كی ل ئیراقێ به‌لاڤكر، به‌لێ گۆتارا چو كه‌سه‌كێ سیاسی ل ئیراقێ نابیته ئه‌گه‌رێ بڕینا ده‌ستێ ده‌ره‌كی د كاروبارێن ئیراقێ دا، چونكه وه‌لاتێ ئیراقێ ژینگه‌هه‌كا گونجایه بۆ ده‌ستێوه‌ردانێن ده‌رڤه د هه‌موو بیاڤاندا نه‌كو تنێ د بیاڤێ سیاسی دا، ئانكو گوتارا موقته‌دا سه‌در چو كاریگه‌ریێن وه‌سا نابن لسه‌ر ره‌وشا ئیراقێ و ده‌ستێوه‌ردانێن ده‌ره‌كی، به‌لكو په‌یاما وی تنێ دێ كاریگه‌ری لسه‌ر جادا ئیراقی هه‌بیت، هه‌تا خوه ده‌رپێخیت و دخوازیت حوكمه‌ته‌كا ل هه‌ڤهاتنا نیشتیمانی پێك بینیت، سه‌در وه‌سا هزر دكه‌ت هه‌كه بهێت و حوكمه‌ته‌كا نیشتیمانی و ل هه‌ڤهاتنێ نه‌هێته پێكئینان، دێ ئیراق به‌ر ب ره‌وشه‌كا ئالۆز چیت، نه‌شێم بێژم رۆلێ ئیرانێ ب په‌یامه‌كا موقته‌دا سه‌دری نامینیت یان رۆل و كاریگه‌ریێن وه‌لاتێن ئیمارات و قه‌ته‌ر ب په‌یاما سه‌دری نامینن، ئێدی سیسته‌مێ په‌رله‌مانیێ ئیراقێ وه‌سایه كیش لایه‌ن بشێت مه‌زنترین لیستا په‌رله‌مانی پێك بینیت، وی ماف هه‌یه ژلایێ قانوونی ڤه حوكمه‌تا نوو پێك بینیت”.
ڤی شرۆڤه‌كارێ سیاسی گۆت ژی” سه‌ركه‌فتیێ ئێكێ یێ هه‌لبژارتنێن ئیراقێ نه‌شێت حوكمه‌تا نوو یا ئیراقێ پێك بینیت، نموونه‌یا د. ئه‌یاد عه‌لاوی باشترین به‌لگه‌یه بۆ ڤێ چه‌ندێ كو شیابوو ٩٢ كۆرسیان بده‌ستڤه بینیت و رێك نه‌هاته‌دان عه‌لاوی حوكمه‌تا ئیراقێ پێك بینیت، ئانكو دده‌مێ نوكه‌دا مه‌رج نینه بڤێ هژمارا كورسیان موقته‌دا سه‌در بشێت حوكمه‌تا ئیراقێ پێك بینیت، مه‌زنترین لیستا د ناڤا جڤاتا نوونه‌ران دا ماف یێ هه‌ی حوكمه‌تا نوو یا ئیراقێ پێك بینیت، بێگومان كاریگه‌ریێن ده‌رڤه ژی ل سه‌ر وێ لیستێ یێن هه‌ین”.
ئاراس عه‌بدولا ئاماژه‌كر” ب دیتنا من موقته‌دا سه‌در یاریزانه‌كێ گه‌له‌ك باش نینه د سیاسه‌تا نافخوه‌یا ئیراقێ دا، ب حوكمێ وێ چه‌ندێ ئێك ژ لێڤه‌گه‌ڕێن شیعانه، خه‌لكه‌ك دگه‌لدا هه‌یه ، زێده‌تر كار بۆ راكێشانا سۆزا وه‌لاتیان دكه‌ت، دگه‌ل وێ چه‌ندێ مه‌رج نینه حوكمه‌تا نوو یا ئیراقێ ژلایێ سه‌دری ڤه بهێته پێكئینان، به‌لێ نابیت سه‌در بهێته پشتگوهاڤێتن ژی، چونكه هه‌كه هات و سه‌در بهێته پشتگوهاڤێتن ئه‌ڤه دێ خوه‌نیشادان ل ئیراقێ هێنه‌كرن و جاده‌یا ئیراقی دێ هێته هاندان ژلایێ سه‌دری ڤه دژی حوكمه‌تێ، له‌وڕا ئه‌ز باوه‌رم د پڕۆسا پێكئینانا حوكمه‌تا نوو دێ سه‌دری رۆلێ خوه هه‌بیت، به‌لێ نه ب وی شێوه‌ی كو ئه‌و حوكمه‌تێ پێكبینیت، ژ به‌ر كو موقته‌دای شیانێن په‌یداكرنا ئالۆزیان یێن هه‌ین”.
