شرۆڤەكارەكێ وەرزشی: سڤكاتیا یاریزانا ب ئاستێ یانەیا نەفت ئەگەرێ خوسارەتیێ بوو
تیما تەپا پێی یا یانەیا دهۆك بۆ جارا ئێكێ د وەرزێ ئەڤ سالە دا ب چار گۆلان بێ بەرانبەر تووشی خوسارەتیێ بوویی دگەل یانەیا نەفت ژ چارچووڤێ گەڕا 22ێ یا خولا پلا نایابا ئیراقێ ئەوا ل شەڤا ئێكشەمبیا بۆری ل یاریگەها شەعب یا نێڤدەولەتی هاتیە كرن، كارڤەدانێن نەرازیبوونێ و حێبەتیێ د ناڤ جەماوەرێ وێ دا پەیدابووینە، ژبەركو خوسارەتیەكا گرانە بوو و تیما بەغدایی خودانا رێزا 18ێ د لیستا خولێ دا، ژبۆ دیاركرنا ئەگەرێن خوسارەتیێ شرۆڤەكارەكێ وەرزشی بووچوونا خوە بۆ رۆژناما ئەڤرۆ بڤی رەنگی دیاركر.
وەحید رەشید راهێنەر و شرۆڤەكارێ وەرزشی یێ یاریا تەپا پێی گۆت: ئەنجامەكێ نە چاڤەڕێ كربوو و كۆمەكا ئەگەران بوونە خالێن خوسارەتیێ، ژ هەمیێ گرنگتر یاریزانێن تیمێ ب خەیالا سەركەفتنەكا ب سانەهی بەرانبەر تیمەكا هوسا هزردكرن چو هێز نینە، دیسان ئەو فشارێن ل سەر تیمێ یا چوونا كۆمەكا یاریزانان بۆ تیما خولا كوردستانێ و ئەنجامێن بەردەوام یێن لاواز د وێ خولێ دا فشارەكا دی ژی ل سەر یاریزانی پەیداكر.
هەروەسان ناڤهاتی گۆت: دبیت هندەك بڕیارێن دادڤانی كارتیكرنا خوە هەبن بۆ نموونە گۆلەكا دروست ب هێچەتا ئۆفسایدێ بۆ دهۆكێ نە هژمارت و گۆلا سێیێ دڕبەك ب تیمێ كەت، هەروەسان چەند خەلەتیێن یاریزانان هەبوون و گۆلپارێزی لەز و نە خوە كونترلكرن د چەندە دەلیڤەكاندا هەبوو، لێ سڤكاتیا یاریزانان بۆ ئاستێ تیما نەفتێ و هزر دكرن دێ ب سانەهی سێ خالان دەستڤە ئینن ئەگەرێ سەرەكی بوو، تیما مێڤان مفا ژ خەلەتی و پاشڤەچوونا ئاستێ یاریزان كر و شیان سێ خالان و سەركەفتنەكا مەزن دەستڤە بینن، ژبیرنەكەین گوهۆڕینێن یانەیا نەفتێ كرین بۆ قۆناغا دویێ ئاستێ وان باشتر لێهاتبوو كو شەڕی بۆ مانا خوە بكەن.
