شعرا من ئێك ژ چیروكێن تەیە
رێژین حكمەت
دڤێ شعرێدا
هەمی چیروكێن من و تە كەڤنن
چ نویبوون ب خۆ ڤە نەدیتینە
ئەڤرۆ من یێن نڤیسین
سوبەهی دوبارە دخوینن
دڤەهینن
تو دزانی
هەر بیرهاتنەكا تە
ئەز یا كریمە شاعێرەكا كەروگ و بێ چارە
ژ ڤێ جادەیێ بۆ یا دی
وەكی مرۆڤەكا سەرخۆش د كۆلاناندا
یاریا ب پێنووسی دكەم
ئەڤ شەڤە ژی
ئەز، ئەز ئەو گەرۆكا دینم
یا دناڤ بیرهاتنێن تەدا مەلەڤانیا دكەم
ئەز ئەو رویبارم
یا تێهنیا ماچەكێ مە
ژ روحا تە بۆ من بیت
ل هیڤیا دەركەڤتنا رۆژێ مە
دزانم
چەند ئەڤ شەڤە درێژبوو
یەلدا ژی ب رێكر
هند شعر ژی خوەش بوو..
ئەگەر تو بهێ
ڤێ شعرێ بخوینێ
چیرۆكا وێ ببینێ
دەسپێكێ بەرێ خۆ بدە لێدانێن دلێ من
بەلێ ژ برینێان ڤەبە
بەرپەرێ ڤێ شعرێ راكە
بەرێ خۆ بدە شینوارێن بەرێ
زولما دونیایێ ل من كری
وی ژی بهێلە دناڤ چیرۆكێدا
بەرێ خۆ بدە ژیانا بێ تە
وەكو شعرەكا خالیە
بێ خواندەڤان
پەرتووكەكا توز گرتییە
ژ وان كەسان ڤەبە یێن ژین ل من كری دوزەخ
ژ هەمی وان نەخوشیێن هەین!
تەدیت؟
ئێك كەیڤ خۆشی و ئارامی یا تێدا ئەو ژی ب تنێ توی..
چـەند ئێش و ئـازار مـن سەر ژێدكەن
دەمێ هزرێن تـە
د مێشكێ من دا قەرەبالغێ دكـەن
تو نزانی
غـەریبیا تە چ ڤولكانا گریێ
د ناخێ مـن دا ئاڤا دكەت
تو نزانی
نـە تو نزانی
چـەند هـیڤی
چـەند خـەون
چـەند بـیرهاتن
د ڤی دلێ هەژارو مەلیل دا هاتنە یێن زینداكرن..
تە ب هاتنا خۆ نەخۆشیێن من كوشتن
شعرا من نوی بوو
من یا مای تو ب تنێ
ب گرنژینا من
تو ژی گەش بووی
ئەز یا ل هیڤیا وێ ڕۆژێ
بێژی
چیرۆكا مە خۆش بوو
ب سنەتا خودێ و پێغەمبەران
ئەڤرو دێ بینە هەڤژین…
