شعرەك یا من دنڤیسیت
رێزان جەعفەر
دویربوونا تە
نە ئارامییەك یا دناخێ مندا دروستكری.
بێهنا خەریبیا تە،
ژۆرا من هەتا خوە جلكێن من ژی
یێن تژی كرین.
د هەر بهۆستەكا ژۆرا خوەدا
دێمێ تە دبینم..
شڤێدی،
دەنگێ پێژنا كەسەكێ ژمێژە ژێ خەریب
دهاتە من..
ژ نشكەكێڤە دەستەكێ پری گەرماتی
د كەتە سەر روویێ من.
هەناسەیەكا تێر و تژی هەست
لەشێ من تەواف دكر و دوورپێچ دكر
مویێن لەشێ من قژ دبوون
گلیزانكێن مرنێ و چاڤەرێبوونێ
ب سەر لەشێ مندا برن
دەست و پێ یێن من رەجفكێ گرتن
لێڤێن من هشك و بێ شەهكرن..
پارچەیێن لەشێ من،
ژ بێزاری و دوویربوونا تە
قێژی ڤەددان و كوفری كرن و خوە ژ خودێ كرن
بۆ گەهشتنا لەشێ من بۆ لەشێ تە
هەستێن من ب رویس و پێخاسی
هەمی سنوورێن وەلاتێ لەشێ من دەرباز كرن
بەری بگەهنە لەشێ تە
من چاڤێن خوە ڤەكرن، دا دێمێ تە ببینم
من دیت تو بەرزە دبووی و
من زانی وەكی هەر شەڤ، بتنێ خەونە ئەز دناڤدا دژیم..
ئەڤ جارە ژی،
هەستێن من دناڤ پێلێن وەلاتێ تەدا نقۆبوون
پارچەیێن لەشێ من شەق شەق و پێتی بوون
چاڤێن من ژ ڕۆندكان
لەق ل تبلێن خوە ددان!
هزرێن من مێشكێ من دخوارن
هەتا ب تەمامی ئەز ژ مێشكی ڤالا بوویم و
ئەزا ل نیڤا ژۆرا خوە
چاڤەرێیێ چوننەیێ دكەم..
