شـۆڕەشـا ئیلـۆنـێ دیـرۆكـا زێـڕینا كـوردسـتانـێ یە
سندس سالح
شۆرەشا ئیلۆنێ ئێك ژ گرنگترین رویدانێن دیرۆكا گەلێ مە یە. ئەڤ شۆرەشە ل سالا 1961ێ دەست پێ كر دەما مەلا مستەفا بارزانی گەڕیایەڤە بۆ كوردستانێ پشتی دوازدە سالان ژ سیرگۆنیێ ل یەكێتیا سۆڤیەتێ. وی ب گەلەك ئاریشەیان را سەرەدەری كر هەتا گەهشتیە وێ باوەریێ كو رێكا چەكداری تنێ چارەسەریە.
دەسپێكا شۆرەشێ هشیاری و هەست و سۆزێن نەتەوەیی د نێڤ خەلكێ مەدا بلند كرن. خەلكێ كوردستانێ یێن ژ هەر چین و تەبەقان پشتەڤانیا شۆرەشێ كرن. گوندی، رەنجبەر، خواندەڤان، بازرگان، ژن و مێر هەمیێ ل گەل ئێك رابوون. ئەڤە ئێكەم جار بوو كو شۆرەشەكا كوردی ئەڤ قەبارە وەرگرتی.
د دەمێ شۆرەشا ئیلۆنێ دا، پێشمەرگەیان گەلەك دەڤەر ئازاد كرن و حوكمەتا ئیراقێ نەشیا وان ژ ناڤ ببەت. لەورا ب نەچاری ڤە ل سالا 1970ێ پەیمانا ئادارێ ل گەل سەركردایەتیا شۆرەشێ مۆركر. ئەڤ پەیمان یا گرنگ بوو چونكی بۆ یەكەم جار دانپێدان ب مافێن گەلێ كوردی هاتە كرن.
شۆرەشا ئیلۆنێ د وارێ فێركرنێ دا ژی گەلەك دەستكەفت هەبوون. گەلەك قوتابخانە هاتنە ڤەكرن و زمانێ مە بوو زمانێ خواندنێ. رادیۆیا دەنگێ كوردستانێ هاتە دامەزراندن كو بوویە دەنگێ شۆرەشێ. رۆژنامە و گۆڤار ب زمانێ مە هاتنە وەشاندن. ئەڤ هەمی تشت بوونە ئەگەرێ گەشەكرنا هوشیاریا نەتەوەیی.
شۆرەشا ئیلۆنێ، سەرەرای كو نەگەهشتە ئارمانجێن خۆ یێن دوماهیێ، لێ د هشیاركرنا خەلكێ كوردستانێ دا رۆلەكێ گەلەك مەزن هەبوو. ناڤێ وێ د دیرۆكێ دا وەك سەرهلدانەكا نەتەوەیی یا مەزن هاتیە تۆماركرن. گەلەك كەسایەتی و سەركردە د وێ شۆرشێ دا دەركەفتن كو بوونە رەمزێن بەرخۆدان و خەباتێ.
بەرخۆدانا پێشمەرگان د چیا و دۆلێن كوردستانێ دا ئێك ژ مەزنترین بەرخۆدانێن سەردەمێ بوو. وان ب كەمترین ئیمكانان شەڕ ل دژی لەشكرەكێ گەلەك مەزنتر و باشتر چەكدار دكر. لێ ئیمانا وان یا قاهیم و باوەریا وان ب دۆزا خۆ یا رەوا ئەو كرنە خودانێن ئیرادەیەكا پۆلایین.
ئەنجامێن شۆرەشا ئیلۆنێ یێن مەزن هەبوون. سەرەرای كو شۆرەش ل دوماهیێ ب رێكا لەشكری نەگەهشتە ئارمانجێن خۆ، لێ گەلێ مە فێر بوو كو بێی ئێكگرتن و خەباتەكا بەردەوام ناهێتە گەهشتن ب مافێن رەوا. هەروەسا بوو دەرسەك بۆ نەیارێن مە كو گەلێ كوردستانێ یێ ئامادەیە هەر قوربانیەكێ بدەت د رێكا ئازادیا خۆ دا.
شۆرەشا ئیلۆنێ بەردەوام دێ مینیت هێما و رەمزا خەباتا گەلێ مە بۆ ئازادی و سەربەستیێ. ئەوێن د وێ شۆرەشێ دا گیانێ خۆ قوربان كرین، ناڤێن وان د دیرۆكێ دا ب زێری هاتینە نڤیسین. ئەركێ مەیە كو ئەم وێ خەباتێ بەردەوام بكەین و نەهێلین خوینا شەهیدان بێ ئەنجام بچیت.
