شـەقیقـە، ژنان پتری زەلامـان دگـریت
د. دلشاد خورشید، تایبه‌تمه‌ندێ نەخۆشیێن مێشك و ده‌مارا دیاركر نه‌خۆشیا شه‌قیقێ ئێك ژ جورێن به‌ربه‌لاڤێن سه‌رئێشێ یه و ل ده‌ف ژنان هه‌یه پتر ژ زه‌لاما و گۆت: دو جورێن سه‌ره‌كى و به‌ربه‌لاڤ هه‌نه، شه‌قیقا كلاسیك ره‌خه‌كێ سه‌رى دگریت دگه‌ل هنده‌ك سه‌رباركا و یا به‌ربه‌لاڤ یا ئه‌وه ره‌نگه سه‌رئێشان یان گێژبوون دگه‌ل هه‌بیت، و گۆتژى: هنده‌ك جورێن دى یێن شه‌قیقێ هه‌نه ژ وان شه‌قیقا گێژبوونێ و یا چاڤى و یا زكئێشانێ ل ده‌ف زارۆكا، به‌هراپتر یا گێژبوونێ ل ده‌ف وان كه‌سا هه‌یه یێن ژیێ وان د سه‌ر 45 سالیێ دا.
تایبه‌تمه‌ندێ مێشك و ده‌مارا دیاركر ژى شه‌قیقه به‌هراپتر ل ژیێ گه‌نجاتیێ په‌یدادبیت و ل ژیێ 45 تا 50 سالیێ ل ده‌ف ژنان نامینت به‌لێ ل ده‌ف زه‌لاما دمینت، و گۆت: ئه‌گه‌ر سێ چار جارا پتر د هه‌یڤه‌كێ دا سه‌رێ مرۆڤى ئێشا دڤێت سه‌ره‌دانا نوشدارێ تایبه‌تمه‌ند بهێته‌كرن، هه‌تا راده‌یه‌كى مرۆڤ دشێت ل مالژى چاره‌سه‌ریا خوه بكه‌ت ب رێیا خارنا حه‌بكێن ژانه‌سه‌رێ.
د. دلشاد خورشید گۆت: شه‌قیقه ئێشانه‌كه دكه‌ڤیته ره‌خه‌كێ سه‌رى و دگه‌ل هنده‌ك نیشانێن دى وه‌ك توره‌بوونا ژ ده‌نگا و روناهیا زێده هه‌روه‌سا عێلنجى و دلرابوون ل ده‌ف وان كه‌سا په‌یدا دبیت یێن شه‌قیقه هه‌یى، و گۆتژى: ئه‌و كه‌سێ شه‌قیقه هه‌ى گه‌له‌ك هه‌ستیار دبت و خه‌وا وان تێک دچیت و هزار وان ژى كێم دبیت هه‌روه‌سا پرچ وه‌ریان ژى ل ده‌ف په‌یدابیت.
سه‌باره‌ت چاره‌سه‌ریا شه‌قیقى د.دلشاد خورشید گۆت: چاره‌سه‌ریا شه‌قیقێ ژ دو به‌شا پێكدهێت، ئێك خۆپاراستن ژ وان تشتێن شه‌قیقێ زێده‌دكه‌ن وه‌ك دره‌نگ نڤستن یان كێم نڤستن و گه‌له‌ك نڤستن كارتێكرنێ ل شه‌قیقێ دكه‌ن، پێدڤیه هه‌رسێ دانێن خارنێ د وه‌ختێ وان دا بهێنه خارن، چونكو هنده‌ك جورێن خارنێ نابنه ئه‌گه‌رێ په‌یدابوونا شه‌قیقێ به‌لێ دبنه ئه‌گه‌رێ زێده‌بونا شه‌قیقێ وه‌ك خارنا شرینى و چه‌ره‌زات و پێپسى و مێلاك و گۆشت هه‌روه‌سا جگاره و نارگێله‌ژى د كارتێكه‌رن، و گۆتژى: دویركه‌فتن ژ ده‌نگێن بلند و روناهیێن بهێز و بێهنێن بهێز و جهێن قه‌ره‌بالغ، ماندیبوونا مێشكى یان یا جه‌سته‌یى و زێده‌كاركرن و وه‌رزش، ئه‌گه‌ر ئه‌ڤێن مه دیاركرین بهێنه پاراستن كونترۆلكرنا 50% چاره‌سه‌ریا شه‌قیقێ دكه‌ن، هه‌روه‌سا جورێ دوێ یێ چاره‌سه‌ریێ ب رێكا ده‌رمانا و نۆشدار بریارێ ل سه‌ر دده‌ت كیش یێ باش و گونجایى بو نه‌خۆشى و كارێ ڤان ده‌رمانا ئه‌وه ناهێلیت شه‌قیقه بهێت.
تایبه‌تمه‌ندێ نه‌خوشیێن مێشك و ده‌مارا زێده‌تر گۆت: مه‌ترسیا شه‌قیقێ ئه‌وه هنده‌ك سه‌ربارك هه‌نه ئه‌گه‌ر گه‌له‌ك ل ده‌ف مرۆڤى درێژبوو نه‌شیا ده‌ركه‌ڤیت یا نه‌خوشه و ره‌نگه ببنه نه‌خوشیێن ده‌روونى، و گۆتژى: 4% كێمتر زێده‌بوونا مێشكى و تەبێ و كه‌تنێ ببت، كێمتر ل ده‌ف وان ژنێن حه‌بێن دژى دوگیانیێ بكاردئینن ره‌نگه توۆشى جه‌لتێن مێشكى بن یێن سڤک یان زێده دلرابوون و های ژ خوه نه‌مینت.
ل دووماهیێ د.دلشاد خورشید تایبه‌تمه‌ندێ نه‌خوشیێن مێشك و ده‌مارا گۆت: شه‌قیقه 15 تا 20 ل ده‌ف خه‌لكى هه‌یه و 1 ژ هزارێ ژ وان سه‌ره‌دانا نۆشدارى دكه‌ن، پێدڤیه ئه‌و كه‌سێ شه‌قیقه هه‌یى خه‌وا خۆ دروست بكه‌ت، چونكو خه‌و ئێك ژ ئه‌گه‌رێن سه‌ره‌كى یه، و گۆتژى: هه‌روه‌سا پێدڤیه ده‌مێن خۆ یێن خارنێ دروستبكه‌ت و دده‌مێ وان دا بخوت، جگاره و نارگێله و مه‌شروب بهێنه كێمكرن و بهێنه هێلان، گه‌له‌ك هزرا نه‌كه‌ت خوه ماندى نه‌كه‌ت بتنێ وه‌رزشه‌كا كێم بكه‌ت ئه‌گه‌ر یوگا بیت باشه.
