شكۆمه‌ندیێن خوه ببه‌ن و هه‌ڕن.. و ل دووڤ خوه ده‌رگه‌هی بگرن
ماجد ئه‌لحه‌یده‌ر
كرمانجیكرن: موحسن عه‌بدلره‌حمان
باشه..
هوون گه‌له‌ك گیرۆبوون
و ئه‌ڤ كۆما مه‌زنا شكۆمه‌ندیان
مالا مه یا بچووك به‌رته‌نگ كریه
لێنانگه‌ه
لیوانك
و ژوورێن نڤستنێ پڕكرینه
و رێگریێ ل یاریكرنا زارۆكێن مه دگه‌ت
***
تكایه هه‌ر تشتی ببه‌ن:
قاره‌مانێن خوه
شاهێن خوه
جهنشینێن خوه
سولتانێن خوه
سه‌ركرده‌یێن خوه
بكه‌نه د وان ته‌لیسێن ل ژێر په‌یسكێ دهاڤێتی
و ژ پێش چاڤێن مه یێن ژ ترسێ و گری
وه‌كو تڤكلێ بیهۆكا هشك
شه‌قشه‌ق بووی
ببه‌ن و ب قه‌شعن
***
سه‌لاحه‌دینی ببه‌ن
و به‌ری بكه‌نه د ته‌لیسی دا ژێ بپرسن
سوهره‌وه‌ردی ب چ تو ترساندبووی
دا ب بێهنفره‌هی بكوژی؟
***
موسایێ كوڕێ نوسه‌یری ببه‌ن
و ژ سه‌رخاترا من، ل دۆر هه‌ژمارا
دروست یا كه‌نیزه‌یان ئه‌وێن بۆ كۆچكا خیلافه‌تی
سه‌بیكرین چه‌ندبوون، ژێ بپڕسن
***
جه‌مال عه‌بدلناسری ژی ببه‌ن
و ب سلاڤا له‌شكری سلاڤ بكه‌نێ
و هیڤیه ژێ بپرسن:
گه‌وره‌م چاوا “شوهدی عه‌تیه: مر؟
***
ئه‌بو جه‌عفه‌ر مه‌نسوری ب تایبه‌ت ببه‌ن
و ده‌ستێ وی یێ پیرۆز ماچی بكه‌ن
و ب نه‌رمی ژێ بپرسن (ئه‌و زوو توڕه‌دبیت)
بۆچی هه‌وه د ته‌نوورێ دا كوڕێ موقه‌ففه‌عی بڕاشت؟
***
هارون و جه‌عفه‌ر
سلێمان قانونی و نادرشاه
وان ژی ببه‌ن د گه‌ل
كه‌نیزه‌كان
و ئه‌نگۆستیلان
و جه‌لادان
و ته‌شتان
و په‌روه‌رده‌كاران
و نۆشداران
و خێڤزانكان
و سه‌ركرده‌یێن فتوحاتان
و باش بازرگانان
و خه‌یزه‌راناتا
و زبه‌یداتا
و لێنه‌ران
و بازرگانێن گولاڤێ
و سێهربه‌ندان
و پۆسته‌چیان
و سیخوه‌ران
و خودانێن دیوانان
و خه‌ساندیان
و مێبازان
و قه‌هره‌ناناتا
و سترانبێژان
و شوونگران
و هۆزانڤانان
و مێژوونڤیسان
و ئاڤگێر
و لێهبۆكان
و خه‌ملینكه‌رێن باجێ
***
ئاه.. ژبیر نه‌كه‌ن
هه‌می ئه‌و گورزێن پرتووكان ل گه‌ل خوه ببه‌ن
و هشیاربن ده‌ستنه‌كه‌نێ
چنكو شها كومبه‌دان ژ په‌مبلوكیا په‌ژیا باوه‌شكان
پڕكریه
و دبیت سه‌ربڕه‌ك خوینگه‌رم ژێ ببه‌په‌شیت
(و ئه‌ڤه یا مه‌ترسیدارتره)
***
هه‌ڕن سه‌رچاڤا بچن
شكۆمه‌ندیێن خوه ببه‌ن
و ده‌رگه‌هی ل دووڤ خوه بگرن
1/6/2013
