شكەفتا ئێنیشكێ ژ نەخۆشخانا شۆڕەشێ بۆ جهەكێ گەشتیاری یێ سەرەنجڕاكێش
ئامێدیێ، مەحمود نهێلی:
دەڤەرا ئامێدیێ ب گشتی ب سروشتێ خوە بوویە ئێك ژ جهێن گەشتیاری یێن سەرنجڕاكێش، هندەك جه هەنە پتر بووینە جهێ سەرنجڕاكێشانا گەشتیاران، ژ وانا ژی شكەفتا ئێنیشكێ، كو شكەفتەكا خوەزایی یە، لێ نوكە بوویە جهەكێ گەشتیاری یێ ب ناڤودەنگ و د دیرۆكا خوە دا چەندین مفا ژێ هاتینە وەرگرتن.
فەریق سەبری، رێڤەبەرێ شكەفتا ئێنیشكێ یا گوزاری بۆ رۆژناما ئەڤرۆ دیار كر، دیرۆكا ڤێ شكەفتێ بۆ بەری حەفت هزار سالان ڤەدگەریت و گۆت: «ل دووڤ ژێدەرێن دیرۆكی ژی ئەڤ شكەفتە ل سەر دەمێن جودا یێن ئایینی دا وەك پەرستەگەهـ هاتیە ب كارئینان».
ناڤهاتی دیار ژی كر، ل سەر دەمێ شۆڕەشا ئیلۆنێ ژی ئەڤ شكەفتە وەك نەخۆشخانە و جهێ ڤەحەواندنا پێشمەرگەی هاتیە ب كارئینان، هەروەسا جهەكێ تایبەتێ شكەفتێ چەكێ پێشمەرگەی تێدا دهاتە پاراستن.
گەشتیارەك ژی داخواز دكەت، حوكمەت پتر گرنگیێ ب ڤان جهان بدەت، ژ بەركو هەم جهەكێ گوزاری یە هەم ژی جهەكێ شوونواری و كەلتۆری یە.
