شه‌رمزاریه بو مروڤایه‌تیێ 40ملیون كوچ به‌ر هه‌بن
گه‌له‌ك روژێن جیهانى یێن هاتینه ده‌ست نیشانكرن وه كى روژا (دایكێ ، ماموستایان ، قوتابیان ، كرێكاران .. هتد ) . به‌لێ هه‌بونا روژه‌كا تایبه‌ت ب كوچ به‌ران ڤه جهێ راوه‌ستیانێ یه ، ئه‌وكه‌سێ ده‌ربه‌ده‌ربوى و بویه خودانێ تراشه‌كێ، یان خیڤه‌ته‌كێ، ب راستى شه‌رمزاریه‌كا مه‌زنه بو هه‌مى مروڤایه‌تیێ و بتایبه‌ت ژى ئه‌گه‌ر به‌ریخوادنه‌كێ بو داتا و ئاماران بكه‌ین د نوكه دا پتر ژ 40 ملیون كوچ به‌ران ل سه‌رانسه‌رى جیهانێ هه‌بن و 7 ملیون ژوان بتنێ ل عیراق و سوریایێ بن.
خوش به‌ختانه كوردستان بویه جهێ حه‌واندنا چه‌ندین جورێن كوچ به‌ران كو ل دویڤ ئاماران د نوكه دا پتر ژ ملیونه‌ك و 200 هزار كوچ به‌ر ل هه‌رێما كوردستانێ هه‌نه . و ئه‌ڤه ژى بیرامه د ئینیته (مه‌دینا منه‌وه‌ر ) یا پێغه‌مبه‌ر (سلاڤێت خودێ ل سه‌ربن) و هه‌ڤالێن وى حه‌واندین و خه‌لكێ وێ ده‌رگه‌هێن مالێن خو بو ڤه كرین.
- پێشنیار دڤێ روژێ دا ..
1- چێكرنا لوبیه‌كى ل سه‌ر ئاستێ هه‌ر پارێزگه‌هه‌كێ پێك بهێت ژ ئه‌ندامێن په‌رله‌مانێ عیراقێ و كوردستانێ یێن ئاكنجى ل وێ پارێزگه‌هێ . كارێ وان یێ سه‌ره‌كى كومكرنا هاریكاریان بیت بو كوچ به‌ران برێكا سه‌ره‌دانكرنێ بو هه‌رسێ سه‌روكاتیان ل هه‌رێما كوردستانێ و عیراقێ . و ل سه‌ر ئاستى نیڤ ده‌وله‌تى ژى سه‌ره‌دانا وه‌لاتێن هه‌ڤ په‌یمان بكه‌ن .
2- چێكرنا ده‌زگه‌هه‌كێ نشتیمانى یێ تایبه‌ت ب (ته‌نگاڤى و كاره‌ساتان) ئه‌ركێ وێ یێ سه‌ره‌كى دابینكرنا پێتڤیێن پێش وه‌خت بو كاره‌ساتێن مه‌زن یێن نه‌چاڤه‌رێكرى بیت .
ل دوماهیێ دێ بێژم هه‌بونا هنده‌ك كه‌سێن وه‌كى (انصار) ى یا هه‌ڤالێن پێغه‌مبه‌رى (سلاڤێن خودێ ل سه‌ربن) چ كوچ به‌ر هه‌ست ب كوچ به‌ریێ ناكه‌ن .
د. جمال كوچه‌ر : ئه‌نادمێ په‌رله‌مانێ عیراقێ
