شه‌ره‌كێ نه‌راگه‌هاندی ل سه‌ر كوردێن باشۆره!
حسێن تاها هرۆرى
باشۆرێ كوردستانێ ئه‌ز دشێم بێژم لاندكا شۆره‌شێن كوردی یه، راسته ل پارچه‌یێن دی ژی یێن كوردستانێ شۆره‌شێن مه‌زن هاتینه‌كرن و كه‌سێن ناڤدار و هێژا ژێ رابووینه، وه‌كی شێخ سه‌عید پیران، مالا به‌درخانیان، قازی محمه‌د و گه‌له‌كێن دی، لێ باشۆرێ كوردستانێ شۆره‌ش و خه‌بات هه‌می ده‌مان هه‌ر ژ سه‌ر ده‌مێ شێخ ئه‌حمه‌دێ بارزانی، عه‌بدوسه‌لام بارزانی، شێخ مه‌حمووودێ حه‌فید، بارزانیێ نه‌مر و كاك مه‌سعۆد بارزانی و مام جه‌لال ته‌له‌بانی، شۆره‌ش ل دووڤ شۆره‌شێ بێی راوه‌ستیان به‌رده‌وام بووینه و كوردان ل ڤێ پارچه‌یا كوردستانێ ب وێ ره‌نج و خه‌باتێ گه‌له‌ك جاران پتر ژ پارچه‌یێن دی یێن كوردستانێ كو جاره‌كێ بتنێ ژی ئه‌و نه‌شیاینه ئوتۆنۆمیێ ژی بده‌ست خوه ڤه بینن، لێ مه وه‌ك كوردێن باشۆر گه‌له‌ك جاران مافێن خوه یێن ره‌وا بده‌ست خوه‌ڤه‌ئیناینه، له‌وما یا دوژمن و نه‌یارێن كوردان هزره‌كێ ژبۆ دكه‌ن و ژێ دترسن هه‌ر و هه‌ر خه‌باتا كوردێن باشۆر بوویه، دوژمنێن مه پارچه‌یا باشۆرێ كوردستانێ هه‌می ده‌مان ب مه‌ترسیتر ل سه‌ر خوه دزانن، ژبه‌ر وێ چه‌ندێ دێ بینی به‌رده‌وام دوژمنێن مه ب هه‌می ره‌نگان دژایه‌تییا باشۆرێ كوردستانێ دكه‌ن و ل دژی هه‌می پێشقه‌چوونێن مه‌نه، ناهێلن ئێك بهار بتنێ ژی بخوه‌شی د سه‌ر كوردێن باشۆر دا ده‌رباس ببیت، به‌رده‌وامییا دژایه‌تییا هه‌میان ل سه‌ر مه و تایبه‌ت تركی و پلانێن وان ل سه‌ر نه‌هێلانا هه‌رێما كوردستانێ ب به‌هانه‌یا هه‌بوونا په‌كه‌كێ و رۆژانه بومبه‌بارانكرنا گوندێن مه و سۆتن و تێگدانا ژینگه‌ها كوردستانێ، تالانكرن و برنا سامان و سه‌روه‌تێن مه و بڕین و دزینا دارێن كه‌ڤنار، زێده‌گاڤی و پێشێلكاریێن وان ل سه‌ر تخویبێن مه، ئه‌رێ دبێژنه ڤێ چ؟ گه‌لو ما نه‌شه‌ره‌كێ نه‌راگه‌هاندی یێ یه‌كلایه‌نی یه ژ لایێ ده‌ستهلاتێن تركی ڤه ل سه‌ر هه‌رێما كوردستانێ؟ هه‌ر وه‌سان یا به‌غدا ل دژی مه دكه‌ت ژ وێ كێمتر نینه یا تركی دكه‌ت، به‌رده‌وامییا مه‌زنكرنا ئارێشه‌یان، بڕینا چه‌ندین جاران مووچه و بودجه‌یا هه‌رێمێ ژ لایێ به‌غدا ڤه ل سه‌ر هه‌رێما كوردستانێ، ما نه‌شه‌ره‌كێ ده‌روونی و ئابۆری یێ نه‌راگه‌هاندییه ل دژی هه‌رێما كوردستانێ؟ یا ژ وان هه‌ردوویان كمباختر ئیرانه ئه‌ڤه چه‌ندین جاران هێزێن بتنێ بناڤ عێراقی یێن ب سه‌ر رژێما ئیرانێ ڤه جار ب مۆشه‌كان و جار ژی ب فرۆكه‌یان هێرشێن چه‌كداری یێن راسته‌وخوه دكه‌نه سه‌ر هه‌رێما كوردستانێ و تایبه‌ت هه‌ولێرا پایته‌خت بێی هۆكاره‌كێ سه‌ركی هه‌بیت، ژبلی مایتكرن و خوه‌سه‌پاندنا وان یا ب به‌رده‌وام ل سه‌ر پارت و لایه‌نێن كوردستانی و تێكدانا ره‌وشا ناڤخوه‌یا هه‌رێمێ ب په‌یداكرنا ناكوكیان د ناڤبه‌را لایه‌نێن سیاسی یێن هه‌رێمێ دا، گه‌لو ما ئه‌و ژی نه‌شه‌ره‌كێ نه‌راگه‌هاندی یه ل دژی مه، ما شه‌ر بتنێ ئه‌ون د چه‌په‌ران دا سینگێ وان بكه‌ڤیته هه‌مبه‌ری ئێك؟ به‌لێ ئه‌ڤه چه‌ندین ساڵه ژ لایێ هه‌ر سێ داگێركه‌رێن كوردستانێ ڤه شه‌ره‌كێ به‌رده‌وام یێ نه‌راگه‌هاندی ل سه‌ر باشۆرێ كوردستانێ یه و بێی به‌رسڤ دانێن چه‌كداری و دبلۆماسی ژ لایێ ده‌ستهلات و پارتێن كوردستانێ و نه ژ لایێ هێزێن ناڤدوه‌لی و رێكخراوێن مافێن مرۆڤان ڤه، ئه‌ڤ شه‌ره به‌ردوامه لسه‌ر مه دهێته كرن و هه‌می دنیا ل سه‌ر كه‌ڕ و یابێده‌نگه.
