شه‌رێ ئسرائیلێ و حه‌ماسێ بوویە ئەگەرێ کوشتنا چەندین رۆژنامەڤانان
ب، سه‌رجان مەحمود:
فیدراسیۆنا نێڤدەولەتی یا رۆژنامه‌ڤانان د مالپه‌را خوه یا فه‌رمی دا راگه‌هاند کو ژ ده‌ستپێکا شه‌رێ ئسرائیلێ و حه‌ماسێ هه‌تا نها 17 رۆژنامه‌ڤان هاتینە کوشتن و حه‌فت رۆژنامه‌ڤان ژی بریندار بووینه، هەروەسا چارەنڤیسێ دو رۆژنامەڤانان ژی هەتا نها دیار نینە.
فیدراسیۆنا رۆژنامه‌ڤانان هه‌روه‌سا ژ ئالیێن شه‌ری خوا‌ست کو ئێرشی رۆژنامه‌ڤانان نه‌کەن و ڕێزێ ل کارێن وان بگرن و ژیانا وان بپارێزن. ژ به‌ر کو ئه‌رکێ رۆژنامه‌ڤانان گەهاندنا راستیێن ل مه‌یدانا شه‌ری یە، بێگومان کار و خه‌باته‌کێ پیرۆز دکه‌ن و نابیت ئالیێن شه‌ری، ئێرشی رۆژنامەڤانان بکەن و مەترسیێ ل سەر ژیانا وان دروست بکەن.
د داخۆیانیێ دا ژ رۆژنامه‌ڤانان ژی هاتیه خوا‌ستن خوە ژ وان جهان دوور بکەن یێن بووینە مەیدانا شەری و هەروەسا گرنگیێ بدەنە پاراستنا خوە و ل ژێر چاڤدێریا هێزێن پاراستنێ ل هەر دەڤەرەکێ دا کار بکەن و ب تنێ نەچنە وان جهان یێن مەترسی لێ هەی.
ل ئالیێ دی نه‌ته‌وێن ئێکگرتی ژی د داخۆیانیه‌کێ دا راگه‌هاند کو د ئێرشێن ئسرائیلێ یێن بۆ سه‌ر غەزە دا ژ رۆژا ده‌ستپێکا شه‌ری هه‌تا نها 17 کارمه‌ندێن سه‌ر ب نه‌ته‌وەیێن ئێکگرتی هاتینە کوشتن و مه‌ترسیا ل سه‌ر ژیانا کارمه‌ندێن سه‌ر ب نه‌ته‌وەیێن ئێکگرتی ژی به‌رده‌وام دکه‌ت.
د پشکه‌کا دی یا داخۆیانیێ دا هاتیه دیار کرن ژی کو نابیت ئسرائیل وه‌لاتیێن سڤیل و کارمه‌ندێن سه‌ر ب نه‌ته‌وەیێن ئێکگرتی بکه‌ته ئارمانجا ئێرشێن خوه و ژ ئالیێن شه‌ری ژی خوا‌ست کو بێی مه‌رج شەرێ نها بدەنە راگرتن، ژ بەر کو ژ بلی رۆژنامەڤانان و کارمەندێن سەر ب نەتەوەیێن ئێکگرتی هەتا نها ب سەدان ژن، زارۆ و وەلاتیێن سڤیل ژی بووینە قوربانی، ژ بەر ڤێ یەکێ ژی دڤێت هەر دو ئالی رێزێ ل ژیانا خەلکی بگرن و شەری بدەنە راگرتن.
چاڤدێرێن سیاسی ژی دیار دکەن، شەرێ ڤێجارێ یێ د ناڤبەرا ئسرائیلێ و حەماسێ دا دێ بەردەوام بیت، چونکی حزبوللا لوبنانێ ژی دڤێت ئێرشی ئسرائیلێ بکەت و هەروەسا ئیران ژی گەفا شەڕی دکەت، وەلاتێن دی یێن جیهانێ ژی پشتەڤانیێ ل ئسرائیلێ دکەن، ژ بەر ڤان ئەگەران جارێ چو ئاماژە نینن، کو دێ شەر هێتە راگرتن و ئسرائیلێ ژی دڤێت دربێن کوژەک ل حەماسێ بدەت و سەرکەفتنا خوە راگەهینیت، ئەمریکا و وەلاتێن دی یێن هەڤپەیمانێن ئسرائیلێ ژی ب هەموو رەنگەکێ هاریکاریا وی وەلاتی دکەن، نها پشتەڤانیەکا باش بۆ ئسرائیلێ و حەماسێ هەیە، ئەو یەک دێ بیتە ئەگەرێ هندێ شەر بەردەوام بیت، بێگومان بەردەوامیا شەری ژی دێ بیتە ئەگەرێ مرنا ب هزاران وەلاتیێن سڤیل، چونکی هەر نها ژی رەوشا ژیانا وەلاتیان ل غەزە گەلەک خرابە و مەترسی ل سەر ژیانا ب سەدان برینداران هەیە، ژ بەر شەری ژی هەتا نها وەکو پێدڤی هاریکاریێن مرۆڤی نەگەهشتینە غەزە.
