شه‌ڕێ حزبی سه‌ندیكا ژی ڤه‌گرتن.. ..
ل هه‌میی دونیایێ سه‌ندیكا رۆلێ سه‌ره‌كی و به‌رچاڤ هه‌یه د هه‌می وارێن رێڤه‌برنا ده‌وله‌تێدا و سه‌ندیكا سه‌نته‌رێ رێخستن و پێشڤه‌برنا كار و چالاكیانه و زۆربه‌یی ته‌خێن جڤاكی بخوه‌ڤه دگریت و رێكدئێخیت، ئه‌ڤجا هه‌ر سه‌ندیكایه‌ك ل دووڤ تایبه‌تمه‌ندیا خوه و دبنه جهێ راوێژكرنێ و پلاندانانێ بۆ جهێن په‌یوه‌ندیدار و هه‌تا هنده جاران كێشا سیاسی ل وه‌لاتا دگوهۆرن! به‌لێ مخابن ئه‌ڤ چه‌نده ل كوردستانێ نینه و سه‌ندیكا هه‌تا راده‌كێ مه‌زن هاتینه پشتگوه هاڤێتن، ئه‌ڤه چه‌ندین ساله هه‌لبژارتن ل گه‌له‌ك سه‌ندیكا نه‌هاتینه كرن، بۆ زانین كو به‌ری نوكه زۆربه‌یا سه‌ندیكا د ناڤبه‌را پارتی و ئێكه‌تیێ دا دابه‌شی دووێ كربوون ل دووڤ رێكه‌فتا ئیستراتیژی و ب ڤی ره‌نگی سه‌ندیكا ب ئێكجاری رۆل نه‌ما و بوونه جهێ دابینكرنا به‌رژه‌وه‌ندیان و رازیكرنا كه‌سان و پشتی تێكچوونا په‌یوه‌ندیان د ناڤبه‌را پارتی و ئێكه‌تیێ دا، زۆربه‌یی لایه‌نێن دی بخوه ده‌لیڤه دیت كو رێخستنا خوه یا سه‌ره‌كی بێخنه د ناڤ سه‌ندیكان دا و نوكه زۆربه‌یی چالاكیێن خوه ب ڤی ره‌نگی دكه‌ن! ململانیه‌كا توند و به‌رچاڤ نوكه د ناڤبه‌را لایه‌نێن سیایدا په‌یدابوویه! و چونكی ئێكه‌تی لاوازبوویه به‌رده‌وام كێشان دروست دكه‌ت و ب هه‌ر ره‌نگه‌كێ هه‌بیت حه‌ز ناكه‌ت هه‌لبژارتن بهێنه كرن، چونكی باش دزانیت د زۆربه‌یی سه‌ندیكایان دا سه‌نگێ خوه ژ ده‌ست ده‌ت و یا هه‌ولده‌ت ده‌مێ ب ده‌ستخوه‌ڤه بینیت و نوكه زۆربه‌یی كادرێن خوه یێن چالاك فرێكرینه كۆلیژان و هۆسا دوباره خوه ب سه‌نگ بێخیت د گۆره‌پانا سیاسیدا! ئه‌ڤه ل ده‌مه‌كی یه كو پارتی ب ته‌مامی سه‌ندیكا پشتگوه خستینه و چ رۆل نینه د چ واران دا ب تنێ نووكرنا هه‌ویان و وه‌رگرتنا ئابوونانه!! له‌ورا دێ بێژین رێخستنا دروست یا هه‌ر پارته‌كێ ژ سه‌ندیكا ده‌ستپێدكه‌ت، چونكی رێخستنه‌كا ئه‌كادێمیه و دگه‌هیته هه‌می ته‌خێن جڤاكی و ب هێزبوونا سه‌ندیكا ب هێزبوونا پارتایه ئه‌وێن كونترۆلا سه‌ندیكا دكه‌ن و به‌روڤاژی! زۆریا كێشا و دروستبوونا قه‌یرانان و نه رێخستنا كاری ژ ئه‌گه‌ری لاوازیا سه‌ندیكا دئێت چونكی سه‌ندیكا دینامۆیێ كاركرنا حوكمه‌تێ یه و رێخستنا ته‌خێن جڤاكی، له‌ورا فه‌ره هه‌رزی چاره‌ك ل كێشێن سه‌ندیكا بهێته كرن و هه‌لبژارتن تێدا بهێنه ئه‌نجامدان و رۆله‌كێ سه‌ره‌كی هه‌بیت د كار و چالاكیێن حوكمه‌تێدا و ب ڤی ره‌نگی د رێژا كێشان و قه‌یرانان ب هه‌می ره‌نگان و د هه‌می وارن دا كێم بیت كو نوكه حوكمه‌ت ژ هه‌ر ده‌مه‌كێ دی پتر پێدڤی ب ڤێ چه‌ندێیه!!
