شه‌ڕێ په‌كه‌كێ و توركیا زیانێن مه‌زن گه‌هاندینه جهێن گه‌شتیاری
هه‌ولێر، قائید میرۆ:
ژ به‌ر مه‌ترسیێن شه‌ڕێ په‌كه‌كێ و توركیا زیانێن مه‌زن گه‌هشتینه كه‌رتێ گه‌شتیاری ل هه‌رێما كوردستانێ و په‌یڤدارێ ده‌سته‌یا گه‌شت و گوزارێ ژی دبێژیت: وه‌به‌رهێنه‌ر نه‌شێن پڕۆژه‌یێن گه‌شتیاری ل هنده‌ك ده‌ڤه‌ران ئه‌نجام بده‌ن.
نادر رۆستی، په‌یڤدارێ ده‌سته‌یا گه‌شت و گوزارێ بۆ رۆژناما ئه‌ڤرۆ دیار كر، هژماره‌كا ده‌ڤه‌ران گه‌شتیاری یێن هه‌رێما كوردستانێ ژ به‌ر شه‌ڕێ په‌كه‌كێ و توركیا بوردۆمانكرنا وان مه‌ترسیا ل سه‌ر هه‌ی، ب تایبه‌تی سنوورێ قه‌زایێن ئامێدی و زاخۆ، ده‌ڤه‌رێن مێرگه‌سۆر و چۆمان و گۆت: “ئه‌ڤه ژی بویه ئه‌گه‌رێ زیان گه‌هاندنێ ب كه‌رتێ گه‌شتیاری ل هه‌رێما كوردستانێ، چونكو گه‌شتیار نه‌شێن سه‌ره‌دانا ئه‌ڤان ده‌ڤه‌رێن گه‌شتیاری بكه‌ن، ب تایبه‌تی پشتی كوشتنا هه‌ردو گه‌شتیارێن عه‌ره‌ب ل سنوورێ ناحیا باتیفا”.
نادر رۆستی گۆتژی: “چه‌ندین ده‌ڤه‌رێن گه‌شتیاری هه‌نه و گه‌شتیار دخوازن سه‌ره‌دانا وان بكه‌ن، لێ ژ به‌ر مه‌ترسیا شه‌ڕی و بوردۆمانێ نه‌شێن بچن، هه‌تا وه‌به‌رهێنه‌ر ژی نه‌شێن چو پڕۆژه‌یێن گه‌شتیاری ل ئه‌ڤان ده‌ڤه‌رێن سنووری ئه‌نجام بده‌ن، ئه‌ڤه ژی بوویه ئه‌گه‌ر زیانێن مه‌زن بگه‌هنه كه‌رتێ گه‌شتیاری ل هه‌رێما كوردستانێ، هه‌كه ئه‌و مه‌ترسی نه‌مینن بده‌هان ده‌ڤه‌رێن گه‌شتیاری هه‌نه و پڕۆژه دێ تێدا هێنه ئه‌نجامدان”.
