شه‌ڕ و نیڤ شه‌ڕ
عومه‌ر سندى
شه‌ڕ و نیڤشه‌ڕ ئێكه، ئه‌ڤه په‌نده‌كا كوردى یا هه‌رى كه‌ڤنه وه‌كى دبێژن نه‌خشێ ل به‌رى یه، هه‌لبه‌ت ئه‌ڤ په‌نده و سه‌دان په‌ندێن دن یێن كوردى هۆسانه هاتینه گۆتن، به‌لكو ده‌رئه‌نجامێن ئه‌زمۆنه‌كا ب هزاران سالان درێژ هاتینه، كورتیا وێ نیڤ شه‌ڕ نینه بتایبه‌ت ئه‌گه‌ر ئالیێ هه‌مبه‌ر هه‌موو هێز و شیانێن خوه بمه‌زێخت ژبۆ ژناڤبرنا مرۆڤى، من مه‌ره‌م ل ڤێرێ بزاڤێن كوردى یێن چه‌كدارن جارێ ل ده‌ستپێكێ ئه‌ز وه‌كو مرۆڤه‌ك هیچ رۆژه‌كێ ل گه‌ل شه‌ڕان نه‌بوومه، چونكى شه‌ڕ تنێ كاڤلكرن و مالوێرانیێ ل پشت خوه دهێلت، لێ جار هه‌یه شه‌ڕ ل سه‌ر مرۆڤى تێ سه‌پاندن، هینگێ دڤێا ده‌ستهلاندن هه‌به، لێ شه‌ڕی ژى ئه‌م ژبیر نه‌كین شاره‌زاى و ته‌كتیك ژێرا دڤێ دێ پارتیا كاركه‌رێن كوردستانێ كمه نموونه، ئه‌ڤ پارتیه ژ سالا 1984 و هێرڤه یا كه‌تیه د شه‌ڕێ چه‌كداری دا ل گه‌ل ده‌وله‌تا تورك مه‌گۆت ده‌ما مرۆڤى بریارا شه‌ڕی دا ل گه‌ل دوژمنى دڤیا ب هه‌موو ره‌نگ و جۆران چه‌په‌ران ل به‌ر ده‌ینه وه‌كو شه‌ڕێ له‌شكرى, ئابوورى, دپلۆماسى …هتد. به‌رى ڤێ هه‌موویێ دڤیا مرۆڤ بكاره خالا لاوازا دوژمنێ خوه ده‌ستنیشان بكه و خالا هه‌رى لاوازا تركیا ئابوورا وێ یه، هه‌لبه‌ت هه‌تانى نها شه‌ڕێ ئابوورى ل گه‌ل ده‌وله‌تا ترك نه‌هاتیه‌كرن كو ئه‌ڤه ژى ئه‌و خاله یاكو ده‌وله‌تێ مفا ژێ دیتى و بێ منه‌ت بیه، چونكى شه‌ڕێ رویبرویبوونا له‌شكرى بوو ده‌وله‌ته‌كا وه‌كو تركیا خوه‌دى هێزه‌كا له‌شكرى یا خورت و ته‌كنولۆژیه‌كا پێشكه‌فتى د وارێ چه‌كى دا كو ئه‌ندامه‌كى هه‌رى گرنگا به‌ندا ئه‌تله‌سى N.A.T.O یه، لێ خوه‌دى ئیكۆنۆمیه‌ك نه‌گه‌له‌ك باشه، بۆ نموونه كه‌رتێ گه‌شتیارى بڕبڕا پشتا ئیكۆنۆمیا تركیایه هه‌تانى نها رۆژه‌كێ گه‌فه‌ك نه‌چوویه ده‌ڤه‌رێن گه‌شتیارى ل وى وه‌لاتى كو پڕانیا گه‌شتیارێن ئورۆپى ل هاڤینان قه‌ست دكنێ، هه‌لبه‌ت گه‌فكرن ل جهێ گه‌شتیارى و په‌یداكرنا ترسێ ل وان جهان سه‌ركه‌فتیترین شه‌ڕه پارتیا كاركه‌رێن كوردستانێ بكه ل جهێ كووه‌ره خوه ل چیایێ قه‌ندیلی دا بده‌ت دۆرپێچكرن و وێ به‌هانێ بده ده‌ست رایه‌دارێن ترك و ئوردیا وان بێنه باشۆرێ كوردستانێ داگیر بكن و مه‌ترسیێ ل سه‌ر قه‌وارا هه‌رێما كوردستانێ په‌یدا بكه، ب راستی ژى ب مخابنیڤه دبێژم ئه‌ڤ نیڤشه‌ڕێ پ ك ك ل گه‌ل ده‌وله‌تا ترك دكه بده‌هان گومانان، ل جه‌م مرۆڤان په‌یدا دكه ل هاڤینه‌كێ ژ هاڤینێن به‌رى پازده سالان ل كافیتریایه‌كا باژێرێ لاهایى سوحبه‌ته‌كا ژ ڤى ره‌نگى د ناڤبه‌را سه‌ركرده‌یه‌ك یێ ڤێ پارتیێ و من دا رویدا، ده‌ما من گۆتیێ ئه‌گه‌ر وه سه‌ركه‌فتن دڤێت دڤیا شه‌ڕێ وه نه‌تنێ چه‌كدارى بت ل چیایێن باشۆرێ كوردستانێ، براده‌رى ل من ڤه‌گێرا وگۆت: ئه‌م پرسا مافێ خوه دكن نه‌كو لێ دگه‌رین وه‌لاتى خراب بكین و ئه‌ڤا تو دبێژى كاڤلكرنا وه‌لاتیه، ب راستى به‌رسڤا وى هه‌م گومانێن من كرنه راستى و هه‌مژى بێ هیڤیبوونه‌ك دایه من، سه‌یره تو ناخوازى وه‌لاتێ دوژمنێ خوه خراب بكى لێ ب ده‌هان گوندێن برایێن ته ل باشۆرێ كوردستانێ د ناڤبه‌را ته و ئارتێشا تركان دا كاڤل ببن گه‌له‌ك نۆرماله؟ و ئه‌ڤ كریاره گه‌لۆ تێنه چ واته‌یێ و چ رامانه‌كێ ددن؟ ئه‌گه‌ر ره‌وش ب ئه‌ڤى ده‌ستودارى و ب ڤى ئاواى به و پلان و به‌رنامه ئه‌ڤه‌به، زه‌ره‌رمه‌ندێ هه‌رى مه‌زن دێ گه‌لێ كوردبه و دوژمنێ گه‌لێ كورد دێ ئارمانجا خوه‌یا مه‌زن ب ساناهى بده‌ستڤه‌ئینن، ئه‌وژى لاوازكرن و پاشێ ژناڤبرنا هه‌رێما كوردستانا باشوره چونكى رایه‌دارێن ترك ل سه‌ر ئاستێ هه‌رى بلند چ سیاسى و چ له‌شكرى ناڤه‌شێرن و ب زه‌لالى دبێژن ئارمانجا مه نه‌هێلانا ڤێ هه‌رێمێ یه و چه‌ندین جاران به‌رپرسێن ئاكپارتى، گۆتینه كو ئه‌گه‌ر ده‌ما هه‌رێما كوردستانێ هاتیه دامه‌زراندن، ئه‌م ل ده‌ستهه‌لاتێدابان، مه ب هیچ ره‌نگه‌كێ رێك نه‌ددا قه‌واره‌یه‌كا كوردى یا ئازاد درست ببه، ئیرۆژى پێنگاڤا باش و بژاره و لۆژیك، ئه‌وه پارتیا كاركه‌رێن كوردستانێ ڤى شه‌ڕى ڤه‌گوهێزه بۆ ناڤ كویراتیا ده‌وله‌تا تركى ب پێنگاڤه‌ك ژ ڤى جۆرى، ئێدى به‌هانه ل به‌ر ده‌وله‌تا تركى نامینن له‌شكركێشى و داگیركاریا هه‌رێما كوردستانێ بكه، دووه‌مژى شه‌ڕبكه‌ڤه ناڤخوه‌یا ده‌وله‌تێ دێ شه‌ڕه‌ك ب باندۆربه ب تایبه‌ت ل سه‌ر رایا گشتى یا تركى هه‌روه‌سا جیهانی ژى وتنێ پێنگاڤه‌ك میناڤێ دێ ده‌وله‌تێ نه‌چاربكه كو ل چاره‌سه‌ریه‌كا ئاشتیانه بگه‌ره و سه‌روشنى پرۆسێسا ئاشتیێ ده‌ست پێ بكه، چونكى دێ كه‌ڤته بن گڤاشتنه‌كا نێڤده‌وله‌تى و ناڤخوه‌ى، ئه‌ڤه د ده‌مه‌كێدایه كو ل تركیا رۆژ ب رۆژ ئوپوزسیۆن یا بهێز دبه، هه‌روه‌سا نه‌رازیێن سیاسه‌تا ئاك پارتى و سه‌رۆكێ وێ هیڤیدارم كورد وه‌كو دوژمنێ خوه شاره‌زا بن د شه‌ڕكرنێ دا و بزانن كێرا دوژمنێ وان دئێشت دوربێ گران ل وێرێ بده.
