شه‌ڤه‌كا ئیلاهی
بابه ئه‌حمه‌د
ئه‌ز یا دعه‌شقێ دا دهێم سۆتن
دبم گوڕی و ئاگر
دبم دویكێل و په‌ل
دل ژ عه‌شقێ په‌نگیا
هه‌ناسه‌یێن گه‌رم دناڤ سیێن سینگێ من چك كرن
بو گه‌هشتنا ته
من ئه‌و هه‌لامه‌تێ ئاشۆپی
دناڤ روحا خوه دا سێداره دا
ئه‌ز یا هیبوویمه ته
ئه‌ڤه به‌ره‌ڤ ته هاتم
جار دله‌رزم
دگریم
بێ ده‌نگ دبم
جار دگڕنژم
سنووران دبرم
بێ چه‌نگ و په‌ر
وه‌ك بالنده‌یان دفرم
ڤێ عه‌شقێ و ژانێن سۆتنێ
نه چاركرم دره‌وێن سپی
دناڤ ڤێ شه‌ڤا تاری دا بكه‌م
به‌ره‌ڤ سه‌ركێشه‌یه‌ك به‌رزه چووم
دناڤ وێ شه‌ڤا ئیلاهی دا
دا بگه‌هم هه‌مبێزه‌كا
وه‌ك وێ هه‌مبێزێ خودێ قه‌د نه‌داین
ب چاڤ و دێم و ڕوی و گه‌رده‌نا
دگه‌ل هه‌ردو لێڤان
د به‌رهه‌ڤ بووین دو شه‌رڤانێن پڕ شه‌ركه‌ر بووین
ل ڤێ جیهانێ ژبلی خوه كه‌سه‌ك دی ل ده‌ردۆر نه‌بوو
ئه‌ز و تو
ب تنێ د خوه‌شیا جیهانا عه‌شقا خوه دا بووین
گۆتنێن دلی
ب شه‌ش په‌یڤێن عه‌شقێ
دناڤبه‌را ده‌ڤ و گوهێن مه دا بوون
ئه‌م
پێكه
دێ
د عه‌شقا
ئێك دا
ژین
ئه‌ڤ گۆتن
هه‌فت جاران مه‌زنتر ژ چیایان
مه دكرن ئاواز و ستران
ب ده‌نگێ خوه بو ئه‌سمانێ هه‌ڤتێ دگۆتن.
