شورتە نێزیكی ناسناڤی بوو و زاخۆ ژ هێلا مەترسیێ دووركەڤت و دهۆكێ دەلیڤەیا سەركەفتنێ ژ دەستدا
تیما تەپا پێی یا یانەیا شورتە یا بەغدایی پێنگاڤەكا باش بەر ب پاراستنا ناسناڤێ خوە یێ وەرزێ بۆری هاڤێژت و زاخۆ ب سەركەفتنەكا گرنگ خوە ژ هێلا مەترسیا داكەفتنێ دوورئێخست و ژلایێ خوەڤە یانەیا دهۆك دو خالێن گرنگ ژ دەستدان، د یاریێن واندا ئەوا ژ چارچووڤێ حەفتییا 34ێ یا خولا پلا نایابا ئیراقێ هاینە ئەنجامدان.
دهۆك نە شیا سەركەفتنا خوە ب پارێزیت
ل یاریگەها خوە تیما تەپا پێی یا یانەیا دهۆك نە شیا ئەنجامێ سەركەفتنا خوە یا ب گۆلەكێ بێ بەرانبەر دگەل مێڤانا خوە یانەیا كەربەلا پارێزیت ئەوا یاری ب وەكهەڤی ب دووماهی هاتی، هەرچەندە یاریزانێن دهۆكێ ئەو ئاستێ چاڤەڕێ كری نیشان نەدا، سەرباری باشتر بوو ژ تیما مێڤان و چەندین دەلیڤەیێن گۆلكرنێ ژ دەستدان، گۆلا پێشكەفتنێ یا دهۆكێ د خولەكا 86ێ دا ژلایێ هێرشبەرێ وێ سیابەند عەگید ڤە هاتبوو تۆماركرن لێ بتنێ پشتی بۆرینا دو خولەكان یانەیا كەربەلا گۆلا وەكهەڤیێ ئینا و نەهێلا خودانێن ئەردی ئاهنگا سەركەفتنێ و پیرۆزكرنا جەژنێ دگەل جەماوەرێ خوە ب گێریت.
زاخۆ ب سەركەفتن جەژنا جەماوەرێ خوە پیرۆزكر
كورێن خابووری ب سەركەفتنەكا گرنگ ل سەر مێڤانا خوە یانەیا نەفت ئەلوەسەت ب دو گۆلان بەرانبەر گۆلەكێ گەشبینی دا جەماوەرێ خوە و مانا خوە د خولێ دا موكمتر لێكر و ب سەركەفتن جەژنا جەماوەرێ خوە پیرۆز كر، د یاریا وان دا ئەوا ل ئەینیا بوری ل یاریگەها زاخۆ یا نێڤدەولەتی هاتیە كرن، هەرچەندە تیما مێڤان ئەوا ب 10 یاریزانان یاری دكر پشتی ب كارتا سۆر یاریزانەكێ وێ هاتیە دوورئێخستن شیان د خولەكا 62ێ گۆلا ئێكێ بینن، لێ كوڕێن خابووری نە هێلا ئەڤ ئەنجامە وەكو خوە بمینت و شیان ب ریمۆنتادا دو گۆلان د ماوێ چار خولەكان دا ل دووڤ ئێك بینن، د خولەكا 69 و 72ێ دا ژلایێ پیشەكارێن خوە یێ كۆتیڤواری بازی ئارماند و یێ نێجیری بۆباكر گابریێل كۆمی دو گۆل تۆماركرن و تیما خوە بەر ب رێزبەندیەكا باشتر بر و خوە ژ هێلا مەترسیێ قورتابكەن.
هەولێر بەردەوامە ل سەر پێشڤەچوونێ و نەورۆز مفا ژ ئەردێ خوە وەرنەگرت
هەردو یانەیێن دی یێن كوردستانی تیما یانەیا هەولێر شیا سەركەفتنەكا باش ل سەر خودانێن ئەردی یانەیا سیناعە بینت ب دو گۆلان بەرانبەر گۆلەكێ و بەردەوامیێ ب دەتە ئەنجام و پێشڤەچوونا خوە د خولێ دا، هەردو گۆلێن تیما قەلا و منارە ژلایێ یاریزانان هەردی سیابەند و شێركۆ كەریم ڤە هاتنە تۆماركرن، ژلایێ خوە تیما چارێ یا كوردستانی یانەیا نەورۆز مفا ژ ئەرد و جەماوەرێ خوە وەرنەگرت پشتی ب دو گۆلان دگەل مێڤانا خوە یانەیا نەفت وەكهەڤبوویی، سەرباری تیما باژێرێ سلێمانیێ یا پێشكەفتی بوو ب دو گۆلان بەرانبەر گۆلەكێ لێ تیما نەفت شیا گۆلا وەكهەڤیێ بەری ب دووماهی هاتنا یاریێ ب نەهـ خولەكان بینت.
شورتە نێزیكی ناسناڤی بوو
ب گۆلەكا هێرشبەرێ خوە یێ سۆری مەحمۆد ئەلمواس یانەیا شورتە ب سەركەفتنەكا گرنگ ل سەر مێڤانا خوە یانەیا ئەلقاسم خوە نێزیكی ناسناڤێ وەرزێ ئەڤ سالە و پاراستنا ناسناڤێ وەرزێ بۆری كر ئەوا ب سەركێشییا راهێنەرێ گەنج ئەحمەد سەلاح شیاینە حەفت خالان خوە ژ هەڤڕكا خوە جەویە دووربێخین پشتی تیما نەفت ئەلبەسرا د یاریەكا دی یا هەمان قۆناغ دا شیایی سەركەفتنێن جەویە ب راوەستینیت و ئەركێ وێ بۆ ناسناڤی ئالۆزتر لێبكەت پشتی ب گۆلەكێ وەكهەڤبووین دگەل ئەلهۆیێن جەویە، ژ ئەنجامێن یاریێن دی، زەورا 1- 2 نەفت میسان، كەرخ 1- چنە تەلەبە، كارەبا 1- چنە حدوود، دیوانیە 1- 2 نەجەف.
رێزبەندیا خولێ گوهۆڕین پەیداكرن
پشتی ب دووماهی هاتنا یاریێن گەڕا 34ێ ژ خولا پلا نایابا ئیراقێ هەلوەستێ گشتی یێ رێزبەندیا یانەیان بڤی رەنگی بوون، شورتە سەرێ لیستێ پاراست ب73 خالان، جەویە 66 خالان رێزا دویێ دهێت، زەورا ب60خال، كارەبا 58خال، تەلەبە 56 خال، نەجەف 52خال، كەرخ ب47 خال، رێزێن سێیێ هەتا هەشتێ دهێن، تیما دهۆكێ ب47 خالان رێزا نەهێ دهێت، هەر ئێك ژ نەفت میسان ب47 خال، كەربەلا 46 خال، نەورۆز ب45 خال و حدوود ب43ێ خالان رێزێن دەهێ هەتا 13ێ دهێن، تیما زاخۆ پێشڤە هاتە رێزا 14ێ ب40 خالان، نەفت ئەلبەسرا ب38 خالان، نەفت ئەلوەسەت 36خال، ئەلقاسم 34 خال، نەفت ب32 خالان، سیناعە ب 27 خالان و دیوانیە ب12 خالان رێزێن 15ێ هەتا 20ێ و دووماهیێ دهێن.
