شوقەیێن كرێداران بێی پێشەكی دێ هێنە بەلاڤكرن
پەیڤدارێ وەزارەتا ئاڤەدانكرنێ دیاركر، شوقەیێن كرێداران ل گورەی مەرجێن حوكمەتێ دێ پشككێشان بۆ هێتە كرن و دبێژیت: ئەڤێن شوقە بۆ دەردكەڤن بێ پێشەكی یە، لێ بۆ دەمێ 25 سالان ب قست دێ پارە ژێ هێتە وەرگرتن.
مەریوان مەلا حەسەن، پەیڤدارێ وەزارەتا ئاڤەدانكرنێ بۆ رۆژناما ئەڤرۆ دیاركر، بڕیارە ل رۆژا پێنجشەمبیا بهێت 24/7/2025 وەزارەتا ئاڤەدانكرنێ دێ دەست ب بەلاڤكرنا شوقەیێن كرێداران كەت و ب شێوەیێ پشككێشان، شوقە دێ هێنە بەلاڤكرن و گۆت: «ل سەرانسەری هەرێما كوردستانێ نەه هزار خێزان ژ شوقەیێن حوكمەتێ دێ مفاداربن و بێ پێشەكی بۆ دەمێ 25 سالان ب شێوەیێ قست دێ پارە هێتە وەرگرتن، بەلێ ل دەستپێكێ قست ناهێنە وەرگرتن، بەلكو دەمێ وەلاتی چو د ناڤا شوقەیێ دا، ل گورەی گرێبەستێ مەهانە قستان بدەتە حوكمەتێ».
مەریوان مەلا حەسەن گۆتژی: «هندەك بنەما هاتینە دیاركرن بۆ كەسێن مفادار دبن، ژ وان ژی: هەبوونا كەسێن كێم ئەندام و هەژمارا ئەندامێن خێزانێ، بەری نوكە فۆرم هاتینە بەلاڤكرن و بۆ مفاداربوون ژ نەه هزار یەكەیێن ئاكنجیبوونێ 26 هزار فۆرم هاتینە پێشكێشكرن، هەر كەسەكێ ناڤێ وی دەركەڤیت و شوقە هاتبیتە تەمامكرن دشێت بچیتە د ناڤا شوقەیێ دا».
