شوونوارەكێ کو مێژوویا وی بەری 60 هەزار سالان ل چیایێ زاوا هاتیە دیتن
دهۆك، لەزگین جوقی
رێڤەبەرێ شوونوار و كەلەپوورێن پارێزگەها دهوكێ راگەهاند، تیمێن دوو زانكۆیێن بیانی گەهشتنە پارێزگەها دهۆكێ و دەست ب كارێ هەلكولینێن شوونواری کرن، هەروەسا دەست ب كارێ دوكیومینتكرن و سەخبێریا پارچەیێن شوونواری دێ هێنە كرن، ئەوێن ل موقبلی و باستكێ و كەموونا هاتینە دیتن.
د. بێكەس بریفكانی، رێڤەبەرێ شوونوار و كەلەپوورێن پارێزگەها دهوكێ بۆ رۆژنامەیا ئەڤرۆ راگەهاند، ل هەیڤا بهێت كار ل سەر هەلكۆلینێن شوونواری ل موقبلی و كەموونا دێ دەست پێ كەت ل قەزا ئاكرێ دەست ب كارێ رۆپیڤانا شوونواری دێ هێتە كرن ل ناحیا رۆڤیا هەلكولینێن شوونواری دێ دەست پێكەن.
د. بێكەس بریفكانی، راگەهاند، دكابینا نەهێدا گەلەك كارەكێ گرنگ و مەزن ل سەر پاراستن و ڤەدیتنا شوونواران هاتیە كرن، هەتا نوكە دوو هزار و 700 جهێن شوونوارێ ل دهۆكێ د تۆماركرینە، ئەڤە بوویە ئەگەر پتر تیم و ڤەكۆلەر ژ زانكۆیێن دەولەتێن بیانێ قەستا پارێزگەها دهۆكێ بكەن بۆ كارێن شوونواری بۆ ڤەدیتنا مێژوویا بەرزەبووی یا میزوپۆتامیا.
رێڤەبەرێ شوونوار و كەلەپوورێن پارێزگەها دهوكێ تەكەز كر، حكوومەتا هەرێما كوردستانێ گەلەك یا هاریكار و پشتەڤانە بۆ پاراستن و كارێن شوونواری كۆ ئەم گەلەك دەولەمەندین ب شوونواران، بەلگە ژێ ئەوە بەری چەندەكێ كۆنفرانسێ ئیكانێ (ICAANE)، لیون ل ولاتێ فەرەنسا هاتە كرن ژ كۆما 756 ڤەكولینێن شوونواری 100 ڤەكۆلینێن زانستی د بوارێ شوونواراندا دگەل پۆستەر و وركشوپان ل سەر هەرێما كوردستانێ بوون، ژ وان ژی 18 ڤەكۆلینێن شوونواری سەر شوونوارێن پارێزگەها دهۆكێ د كۆنفرانسێ ئیكانێ دا ل فەرەنسا هاتنە پێشكێشكرن، ئەڤە بەلگەیە كۆ حكوومەتا هەرێما كوردستانێ گەلەك گرنگی ب شوونواران ددەت.
گۆت ژی، پلانا كارێ شوونواری ل دەڤەرا ئامێدیێ هاتیە دانان بۆ جهێن خواندنگەها قوبەهان و گۆرستانا میرا و مزگەفتا ئامێدیێ و كورا سیریجێ و كەنیسا كلدانیا و گوڕێ پیر حەزان كۆ پلان ب شێوازەكێ گەلەك باش هاتیە دارشتن بۆ پاراستنا رەسەناتیا شوونوارێ دەڤەرا ئامێدیێ ل نێزیك دەست ب كارێ پرۆژێن ئامێدیێ دێ هێتە كرن.
د. بێكەس بریفكانی گۆت: گەلەك كارەكێ مەزن ل سەر شوونوارێن دهۆكێ هاتیە كرن، نوكە پارچەیێن شوونواری یێن كەڤنار هاتینە دیتن ل چیایێ زاوا كۆ میژوویا وان بۆ 60 هزار ساڵان دزڤریت.
