شوینوارێن ئەڤینێ
سەگڤان ئەحمەد
دوهی چووم شینوارێن ڤینێ
كەلها عەشقێ یا كاڤل بوو
برین كەتە لسەر برینێ
باغەك وێران بێ سۆر گول بوو
نەد هات پێژنا خوین شرینێ
ونە چرایەك لوێرێ هل بوو
دلدارێ ڕەش چاڤا ئەزم
ئەو هیڤی و ئۆمێدا دل بوو
ئەز نزانم ل كیڤە ما
بووم ڕێڤنگێ شەڤا تاری
من هلگرت ئالایا خەما
برینا من خوین ژێ باری
پشتی یارێ بۆ من نەما
ژین بێ تامە ل ڤی واری
كەتم بەر بارۆڤا ئێشا
دلێ من ژخۆشییا سل بوو
ل گەمیا خەما سوارم ئەز
كەتم بەر بارۆڤە و پێلا
ب قێرین و هەوارم ئەز
من دلێ خوە ل كیڤە هێلا
من تیر هاڤێتە ئارمانجێ
نە گەهشت ئارمانج و كێلا
چ شەڤ ڕەشە ب سەر مندا هات
چانتێ خەما ژی ل مل بوو
ئەز بوومە هەلگرێ ژانا
ڕێ بەرزە و ڕێڤنگم ئەز
ل كیڤەیە شاها جانا
وەك بلبلەك بێ چەنگم ئەز
ئەڤە ژییێ من تەڤ بۆری
دگەل كوڤانا د جەنگم ئەز
نەما ئێدی ئەز ب بینم
ڕوی ب خال و چاڤ ب كل بوو
