شڤان جەمیل: گەشبینین خەونا جەماوەرێ خوە بکەینە ڕاستی
عەلی حاجی:
یارییا ئەڤرۆ یا تیما فوتبۆلا یانەیا زاخۆ بەرانبەر یانەیا نەجەف ل یاریگەها وێ تایبەتمەندییا خوە یا دیرۆکی هەیە، هەموو پشتەڤانێن یانەیێ چاڤەڕێ سەرکەڤتنێ نە ژبۆ گەهشتن بەر ب خەونا خوە یا مەزن ئەو ژی پشکداری د قارەمانییەکا دەرڤە دا، ئەڤ یارییە دێ ل دەمژمێر ٩:٣٠ ل یاریگەها نەجەف هێتە کرن، رۆژنامەیا ئەڤرۆ بۆچوونێن کارگیری و یاریزانان وەرگرتینە ئەوێن بڤی شێوەیی گەشبیینا خوە دیار کرین.
ل دەستپێکێ هشیار شەهباز سکرتێرێ یانەیا زاخۆ گۆت: تیما مە ژ هەمی روویەکێ ڤە د رەوشەکا گەلەک باش دا دەرباز دبیت ژبەرکو ب رێژەیەکا گەلەک باش مە قارەمانیەکا ژ دەرڤە مسوگەر کریە لێ هێشتا مە پێدڤی ب سێ خالان هەیە داکو ب شێوەیەکێ فەرمی ئەم رێزا سێیێ مسوگەر بکەین بێ کو ئەم ل هیڤییا ئەنجامێن چو یانەیان دی بمینن، تیما مە ئامادەکاریێن تەمام کرینە بۆ یاریا نەجەف و ئەڤ یارییە ژ یاریێن ب زەحمەت و گرنگە بۆ تیما مە ژبەرکو ئەم بۆ سێ خالان ل باژێرێ نەجەفین، تیما بەرامبەر ئێک ژ تیمێن ب هێزە و هەر چەندە مانا خوە د خولێ دا ئێکلا کریە لێ ئەو ژی دێ بۆ سەرکەڤتنێ یاریێ کەن و تیما مە ژی یا ب ساناهی نینە د خولێ دا، مە باوەرییەکا تەمام ب تیما خوە هەیە کو دێ شێن باشترین ئاست پێشکێش کەن.
یاریزانێ تیما زاخۆ شڤان جەمیل گۆت: سەرکەڤتنا ل سەر نەفت بەسرا مە ژبیر کریە و ئەم کار بۆ یارییا بەرامبەر نەجەف دکەین و ئەم دێ بێ گڤاشتن چینە دناڤ یاریێ دا ژبەرکو تیما مە هەتا ڕادەیەکێ باش رێزا سێیێ ئێکلا کرییە، لێ ئەم دێ هەر بۆ سەرکەڤتنێ یاریێ کەین داکو رێزا سێیێ ب شێوەیەکێ فەرمی بۆ تیما مە بیت و قارەمانیەکا ژ دەرڤە بهێتە ئێکلا کرن، هەمی یاریزان د ئامادەنە بۆ یاریێ و ئەم هەمی دێ شەری بۆ لوگویێ یانەیا زاخۆ کەین و جەماوەرێ مە ژ هەژی هەر تشتەکێ یە، پێدڤییە ژی ئەم خەونا جەماوەرێ خوە بکەینە ڕاستی بۆ هندێ ئەم د ئەڤ سالە دا تیما خوە بگەهینە قارەمانیێن ژ دەرڤە.
