شڤان حاجی: به‌رهه‌ڤكرنا تیمه‌كا پاشه‌رۆژێ گرنتره ژ هه‌ڤڕكیا ناسناڤی
ئه‌ڤرۆ،
چاڤه‌ڕێ دهێته كرن ئه‌ڤرۆ ده‌مژمێر سێ پشتی نیڤرۆ تیما ته‌پا پێی یا یانا دهۆكێ یاریا خوه یا ئێكێ ژ چارچووڤێ هه‌ڤڕكیێن كۆما ده‌ڤه‌را باكور و ناڤه‌راست یا خولا ئیراقێ بۆ یانێن پلا ئێك ئه‌نجامبده‌ت ده‌مێ مێڤانداریا یانا شرگات دكه‌ت كو پێنچ یانه پشكدارن ئه‌وژی، دهۆك، پێشمه‌رگا سلێمانی، شرگات، عه‌له‌م و دیالا.
لدور دووماهی به‌رهه‌ڤی و پلانێن نوونه‌را پارێزگه‌هێ د داخویانیه‌كێ دا شڤان حاجی راهێنه‌رێ تیما دهۆكێ بۆ رۆژناما ئه‌ڤرۆ گۆت: بۆ ماوه‌كێ درێژه مه به‌رهه‌ڤیێن خوه لدووڤ پلانێن تایبه‌ت كرینه پێخه‌مه‌ت باشترین شێوه بهێنه دناڤ یاریێن خولێ دا، ئاستێ یاریزانێن مه تا راده‌یه‌كی د باشن هه‌رچه‌نده سه‌ربۆره‌كا كێم یا هه‌یی د پشكداریێن خولان دا، پشكداریا مه ژی دێ یا جودا بیت ژ هه‌ڤڕكیێ بۆ ناسناڤی ژبه‌ركو مه و كارگێریا یانێ ئارمانجه‌كا درێژ و پاشه‌رۆژێ هه‌یه ئه‌وژی دروستكرنا تیمه‌كا گه‌نج بۆ تیمێن یانێ د خولا كوردستانێ و ئیراقێ دا و دیسان ئه‌و ڤالاتیا هه‌یی ژ نه‌بوونا یاریزانێ گه‌نج ئه‌م قه‌ره‌بوو بكه‌ین و پشتبه‌ستن لسه‌ر كوڕێن دهۆكێ بهێته كرن.
هه‌روه‌سان ناڤهاتی دیاركر هه‌ڤڕكی بۆ ناسناڤی نه یا گرنگه به‌لكۆ دروستكرن و په‌یداكرنا یاریزانێ شاره‌زا و به‌رهه‌ڤ بۆ پاشه‌رۆژه‌كا نێزیك ئه‌و گرنتره و گۆت: وه‌كو كادرێ راهێنانێ مه گه‌له‌ك زه‌حمه‌ت بریه پێخه‌مه‌ت ئه‌م ڤان یاریزانان به‌رهه‌ڤ بكه‌ین و پرانیا وان دژیێن بچووك دانه ئه‌ڤچه‌نده ژی ب هه‌ڤكاری و پشته‌ڤانیا كارگێریا یانێ یه كو ئه‌م هه‌موو بهێنفره‌هین دێ گه‌هینه ئارمانجا خوه ئه‌وژی یاریزانێ گه‌نج ب باشترین شێوه به‌رهه‌ڤبیت، له‌ورا هیڤییا من ئه‌وه بشێن به‌رده‌وماهیێ بده‌ینه پلانا خوه پێخه‌مه‌ت بگه‌هینه وێ رۆژا مه ئارمانج بۆ دانایی.
