شڤان دۆسكی: كارێن باش یێن هونه‌ری د پشت بێده‌نگیا من ڕا هه‌نه
ئه‌ڤرۆ، رێوار محه‌مه‌د ره‌شید:
سترانبێژێ گه‌نجێ پارێزگه‌ها دهۆكێ (شڤان دۆسكی) د دیداره‌كێ دا بۆ به‌رپه‌رێ هونه‌ری یێ رۆژناما ئه‌ڤرۆ ئاشكرا كر كو نوكه ئه‌و به‌رهه‌ڤیان بۆ تۆماركرنا سترانه‌كا كوكتێل دكه‌ت، ئانكو چه‌ندین سترانان دێ د ناڤ سترانه‌كێ دا بێژیت و ل ده‌مه‌كێ نێزیك دێ ڤێ سترانێ ل ستودیۆیێ تۆماركه‌ت و هه‌ر ده‌مێ ب دووماهی هات دێ ب شێوه‌یێ كلیپ پێشكێی حه‌زژێكه‌رێن ده‌نگێ خوه كه‌ت.
ناڤهاتی ئاماژه دا وێ چه‌ندێ كو راسته ئه‌ڤه ده‌مه‌كه وی چ كارێن نوو یێن هونه‌ری ئه‌نجامنه‌داینه، به‌لێ ل دووڤ گۆتنێن شڤانی كارێن باش یێن هونه‌ری د پشت بێده‌نگیا وی ڕا هه‌نه و مزگینی ژی دا حه‌زژێكه‌رێن ده‌نگێ خوه كو چاڤه‌ڕێ نووترین كارێن وی یێن هونه‌ری بن.
هه‌مان سترانبێژ دیار كر كو وی به‌رهه‌ڤیێن باش بۆ هه‌یڤا ئادارێ ب تایبه‌تی بۆ جه‌ژنا نه‌ورۆزێ كرینه و دێ چه‌ندین كارێن نوو یێن هونه‌ری هه‌بن و ره‌نگه ئه‌و و سترانبێژه‌ك سترانه‌كا كوكتێل پێكڤه تۆمار بكه‌ن و هه‌موو به‌رهه‌ڤی ژی بۆ ڤێ مه‌ره‌مێ كرینه و گۆت: “سه‌ره‌رایی وێ چه‌ندێ كو هه‌تا نوكه من چه‌ندین سترانێن تۆماركری و كلیپ هه‌نه، به‌لێ به‌رده‌وام ب رێیا ئاهه‌نگ و داواتان ژی ئه‌ز خزمه‌تا حه‌زژێكه‌رێن ده‌نگێ خوه دكه‌م”.
