شڤان رێكانی: حه‌ز ناكه‌م سترانێن دوقۆلی ل گه‌ل سترانبێژێن ئافره‌ت بێژم
ئه‌ڤرۆ، هه‌رهین:
سترانبێژ شڤان رێكانی، دیداره‌كی َدا بۆ به‌رپه‌رێ هونه‌ری یێ رۆژناما ئه‌ڤرۆ دیاركر كو نوكه ئه‌و مژوولی ئه‌لبۆمه‌كا شه‌ش تراكیه ب ناڤێ (وه‌غه‌رخێربیت) و سێ ژ وان سترانا په‌یڤ و ئاوازێن وی بخوه‌نه و ژڤانه ل سالا نوی بهێته به‌لاڤكرن.
ناڤهاتی گۆت: ئه‌ڤه به‌رهه‌مێ من یێ دویێ یه و ژڤان بوو ئه‌لبۆما من یا نوی ل جه‌ژنا قوربانی بهێته به‌لاڤكرن، به‌لێ ژ به‌ر چه‌ند ئه‌گه‌ران نه‌هاته به‌لاڤكرن و نه ل گه‌ل هندێ مه كو بێژن سترانه‌كا خوه‌ش به‌رامبه‌ری ئه‌لبۆمه‌كێ یه و هه‌كه ب ڤی شێوه‌ی با كه‌سێ ستران چێنه‌دكرن، مه گه‌له‌ك سترانبێژ هه‌نه وه‌كو شوكری رێكانی و خه‌لیل باكوزی و محه‌مه‌د عارفێ جزیری من نه دیتیه ڤان چ كلیپ چێكرین، به‌لێ سترانێن وان ئێك ژ ئێكی خوه‌شتره و ئه‌و سترانبێژێ ئه‌لبۆمێن چه‌ند تراكی چێدكه‌ت سترانا ب دلێ خوه هه‌لدبژێرت و سترانبێژێن مه و گه‌له‌ك سترانبێژ هه‌نه د سالێ دا دو به‌رهه‌م به‌لاڤكرینه و چێكرنا ئه‌لبۆمان ژی چ خێر تێدانینه و نوكه هه‌ر چه‌ند هه‌یڤان كلیپه‌كێ چێدكه‌ن دا نه هێنه ژبیركرن و ژ كارێ خوه دوور نه‌كه‌ڤن.
ل دووماهیێ شڤانی گۆت: “سترانێن ئه‌ز دبێژم ئه‌ڤینی و سه‌رده‌مانه‌نه، چونكو سترانا ئه‌ڤینی نامریت و به‌رده‌وام گوهدارێ خوه یێ تایبه‌ت هه‌یه و حه‌ز ژ ده‌نگێ هه‌موو هونه‌رمه‌ندان دكه‌م بۆ سترانا دوقۆلی، به‌لێ من نه‌ڤێت سترانا دوقولی ل گه‌ل سترانبێژێن ئافره‌ت چێكه‌م و ئه‌ڤه دده‌مه‌كی دایه كو گه‌له‌ك داخوازی ژ لایێ سترانبێژێن ئافره‌ت ڤه بۆ گۆتنا سترانا دوقۆلی ژ من هاتینه‌كرن، به‌لێ من ره‌تكرینه.
