شڤان له‌زگین: باشترین شێوه نوونه‌راتیا وه‌لاتێ خوه د قاره‌مانیا نێڤده‌وله‌تی دا كر
ئه‌ڤرۆ،
د دیداره‌كێ دا دادڤانێ پارێزگه‌ها دهۆكێ و كوڕێ باژێرێ سێمێلێ شڤان له‌زگین دیاركر كو ئه‌وی باشترین شێوه شیایه هه‌ڤڕكیێن قاره‌مانیا كۆمارا پاكستانێ یا نێڤده‌وله‌تی بۆ یاریا تایكۆاندویێ ب رێڤه‌ببه‌ت ئه‌وا یاریێن وان ب پشكداریا زێده‌تری 38 وه‌لاتێن جیهانێ ل ئیسلام ئه‌باد هاتینه كرن.
زێده‌تر شڤان له‌زگین بۆ رۆژناما ئه‌ڤرۆ گوت: شانازیێ پێ دبه‌م وه‌كو ئێكه‌م راهێنه‌رێ كورد و سه‌ر ئاستێ ئیراقێ یاریێن نێڤده‌وله‌تی و باوه‌رپێكری ژلایێ ئێكه‌تیا تایكۆاندویا جیهانی برێڤه‌ببه‌م و ببمه جهێ باوه‌ریێ و ده‌ستخووشیێ كو شیایمه باشترین شێوه نوونه‌راتیا وه‌لاتێ خوه كوردستانێ ب سه‌ركه‌فتیانه بكه‌م، پێنه‌ڤێت ئه‌ڤچه‌نده ژی ب رژدی و ئارمانج بوویه وه‌كو كورده‌كێ ئێكانه بۆ هه‌موویان دیاركه‌م د وه‌رزشێ دا ئه‌م ژی خودان شیانین و حه‌زا وه‌رزشێ هه‌یه.
ژلایه‌كێ دووڤه ناڤهاتی ئه‌وچه‌نده ژی دیاركر كو پشتی شیایی یاریێن دناڤبه‌را هه‌لبژارتیێن ئه‌لمانیا، ئۆكراین، توركیا، ئیران، جورجیا و گه‌له‌ك هه‌لبژارتیێن دی ژلایێ وه‌زیرێ وه‌رزشا پاكستانێ ڤه هاته خه‌لاتكرن كو ئێك ژ باشترین دادڤانێن ده‌وله‌تی و سه‌ركه‌فتیانه برێڤه‌برین و گوت: ئه‌ڤه پێنگاڤا ئێكێ یه یا دادڤانیا ده‌وله‌تی كو ده‌رگه‌ه بۆ قاره‌مانیێن مه‌زنتر هاتینه ڤه‌كرن پشتی ئێكه‌تیا جیهانێ یا یاریا تایكۆاندویێ په‌سنا شیانێن من كرین، له‌ورا ئه‌ز شانازیێ پێ دبه‌م وه‌كو كورده‌ك سه‌رباری بناڤێ ئیراقێ پشكداربووین لێ سه‌ربلندم خه‌لكێ پارێزگه‌ها دهۆكێ و باژێرێ سیمێلێ گه‌هشتیمه ڤێ قۆناغێ و رژدم پلێن باشتر و پشكداریێن مه‌زنتر ب ده‌ستڤه‌بینم.
