(شڤان په‌روه‌ر) و (زارا پاشا) ل سه‌ر چیایێن رووسیا سترانان بۆ كوردستانێ دبێژن
ئه‌ڤرۆ:
هه‌ر دو هونه‌رمه‌ندێن ناڤدارێن كورد شڤان په‌روه‌ر و زارا پاشا، سترانا خوه یا ئێكێ یا دوقۆلی یا كوردی بناڤێ (وه‌لاتێ من) ل وه‌لاتێ رووسیا كلیپ دكه‌ن، ئه‌ڤ سترانه كارێ ئێكێ یێ هه‌ڤپشكێ هه‌ر دو هونه‌رمه‌ندایه و ل ده‌مه‌كێ نێزیك دێ هێته به‌لاڤكرن.
زارا پاشا مه‌حوی، هونه‌رمه‌ندا كوردا رووسیا بۆ كوردستان24 گۆت: ” ئه‌ز شانازیێ ب ڤی به‌رهه‌می دكه‌م ژ به‌ر كو من ل گه‌ل هونه‌رمه‌ندێ مه‌زنێ كورد (شڤان په‌روه‌ر)ی گۆتیه كو ئه‌و ده‌نگێ زارۆكینیا من و ده‌نگێ گه‌لێ منه، ب دیتنا من مه سترانه‌كا گه‌له‌ك باش ب ناڤێ (وه‌لاتێ من) تۆماركریه كو ئه‌ڤ سترانه به‌حسێ ئه‌ڤینا وه‌لاتی و نشتیمانی و حه‌زژێكرنا گه‌لی دكه‌ت، كارێ وێنه‌گرتنا ڤێ كلیپێ ل چیایێن رووسیا هاتیه ئه‌نجامدان و ل ده‌مه‌كێ نێزیك دێ ب دووماهی هێت، هه‌روه‌سا تێكێستا ڤێ سترانێ ژ لایێ (تارا مه‌مێد) ڤه هاتیه نڤیسین و (یاسمین لێڤی) ژی كارێ مۆزیكێ بۆ ڤێ سترانێ ئه‌نجامدایه”.
ژ ئالیێ خوه ڤه هونه‌رمه‌ند شڤان په‌روه‌ر بۆ كوردستان24 گۆت: “ئه‌و هونه‌رمه‌ندێن د ناڤ خه‌لكی دا د به‌رنیاس و به‌رهه‌مێن نوو چێدكه‌ن دڤێت خه‌لك ژی یێ ژێ مفاداربیت، ئه‌م ژی وه‌كو هه‌موو گه‌لێن دی خودان كه‌لتوور و ئه‌ده‌ب و فه‌رهه‌نگا خوه‌ینه و شانازیێ پێ دكه‌ین، پێدڤیه هه‌موو هونه‌رمه‌ندێن كورد خزمه‌تا نه‌ته‌وه‌یا خوه بكه‌ن”.
