شۆخان نورەددین بوو گۆلكەرا دیرۆكی یا خولا سعۆدیێ
ستێرا كورد و یاریزانا یانەیا ئافرەتێن دهۆك و پیشەكارا یانەیا هیلال یا سعۆدیێ شۆخان نورەددین ب ناڤێ گۆلكەرا دیرۆكی یا خولا پلا نایابا سعۆدیێ ل سەر ئاستێ كچان هاتە خەلاتكرن، پشتی شیایی د گەڕا 10ێ یا خولێ دا سێ گۆلان هاتریك تۆماربكەت و هژمارەیا گۆلێن خوە بگەهینە 52 گۆل و ب فەرمی ببیتە گۆلكەرا دیرۆكی یا خولێ.
د یارییا بۆری یا گەڕا دەهێ ژ خولێ یاریزانا ناڤهاتی شیا سێ گۆل هاتریك ل سەر تیما ریاز بینت و سەرجەمێ حەفت گۆل بەرانبەر گۆلەكێ تیما وان سەركەفتنێ بینت و ژلایێ فیدراسیۆنا تەپا فوتبۆلا سعۆدیێ ب تەپا زێری ژی بهێتە خەلاتكرن، سەرجەمێ گشتی هەر ژ پەیوەندیا وێ بۆ ناڤ رێزێن تیما هیلال ل وەرزێ 2022 هەتا 2024ێ شیایە 52 گۆلان تۆماربكەت و ببیتە گۆلكەرا دیرۆكی د خولێ دا.
شۆخان نورەددین یاریزانا كورد و خەلكا هەولێرا پایتەخت ل مەها بۆری گرێبەست دگەل یانەیا ئافرەتێن دهۆكێ ئیمزاكربوو ژبۆ پشكداریێ دگەل تیما وان بۆ وەرزێ نوو یێ خولا فوتسالا كوردستانێ لێ ژبەر گوهۆڕینا ژڤانێن خولا تەپا پێی بۆ یاریگەهێن مەزن یا خولا نایابا سعۆدیێ هاتنا وێ بۆ ناڤ رێزێن تیما ئافرەتێن دهۆكێ گیرۆبوو و بڕیارە پشتی ب دووماهی هاتنا خولێ و ناڤەراستا ڤێ مەهێ بگەهیتە دناڤ رێزێن تیما دهۆكێ دا.
