شۆرشا سوشیال میدیایێ
عه‌بدولره‌حمان بامه‌رنی
ئایا ئه‌م دشێین سۆشیال میدیایێ ب شۆرش ناڤ بكه‌ین؟ بۆ به‌رسڤدانا پرساره‌كا ژ ڤی ره‌نگی، دڤێت ل هنده‌ك داتایێن سۆشیال میدیایێ بخوه بزڤرین و كا د سۆشیالێ دا چ روودده‌ت. دا كو بابه‌ت گه‌له‌كێ هلنه‌گریت، دێ زێده‌تر ل سه‌ر بابه‌تێن ره‌وشه‌نبیری راوه‌ستم و مه‌به‌ستا من ژی ب ئازراندنا بابه‌ته‌كێ ژڤی جۆری، بۆ سه‌رنج راكێشانا خوانده‌ڤایێ كورده و د هه‌مان ده‌مدا، بۆ سه‌رنج راكێشانا نڤیسه‌رێ كورده.
ئێكه‌م جار، دڤێت بزانین سۆشیال میدیا چ پێشكێش دكه‌ت: د سوشیالێدا و ئه‌گه‌ر ئه‌م تۆڕا فه‌یسبۆكێ بكه‌ینه نموونه، كو زێده‌تر به‌كارهێنه‌رێن خوه‌هه‌نه. نه بتنێ د رۆژێ دا جاره‌كێ، به‌لكو ژ ده‌مژمێرێ ژی ڤه‌گه‌ره و د هه‌ر چڕكه‌یه‌كێ دا ده‌هان پۆست دكه‌ڤنه به‌رچاڤێن مرۆڤی و ره‌نگه ئه‌گه‌ر په‌یوه‌ندیێن مرۆڤی گه‌له‌ك بن و مرۆڤ د گه‌له‌ك په‌یچان دا یێ كاڕا بیت، هه‌ر مرۆڤ ناگه‌هیت ته‌ماشه‌ی هه‌میان بكه‌ت و ره‌نگه دێ گه‌له‌ك تشتێن زێده د به‌رچاڤێن مرۆڤی را ده‌رباز بن یا من دڤێت بێژم، گه‌له‌ك تشتێن گرنگ، جهێ پیته‌دانا مرۆڤی، یێن مرۆڤی حه‌ز لێهه‌ین پێزانینان ژێ وه‌ربگریت ده‌رباز دبن و مرۆڤی ئه‌و ده‌م نامینیت ل سه‌ر هه‌میان راوه‌ستیت و ئه‌ڤ راوه‌ستیانا هه‌نێ ژی من مه‌به‌ست پێ هه‌یه بكه‌مه نیڤشكێ بابه‌تێ خوه كو من ب شۆرش ناڤكری.
دا ژ نڤیسكایێ ده‌ستپێبكه‌ین:
ل دویڤ پۆست و گۆتارێن د (سۆشیال میدیایێ) دا دهێنه بلاڤكرنێ. ئێدی خه‌لك نه‌چار نینه ل سه‌ر گۆتارا یان پۆسته‌كێ درێژێ كه‌سه‌كی راوه‌ستیت، تا لدووماهیێ بزانیت كا ڤی نڤیسكارێ هه‌نێ چ نڤیسی یه. ئه‌گه‌ر پێش خورتبوونا ئه‌نترنێتێ لده‌ف مه، نڤیسه‌ران گۆتارێن درێژ هه‌بن، رۆژنامێ بۆ نیڤ لاپه‌ر یان زێده‌تر ته‌رخانكربن و خوانده‌ڤانی گۆتارا وی هه‌می خواند بیت، ئێدی د سۆشیالێ دا ئه‌و نه‌ما. ده‌ما خوانده‌ڤان گۆتاره‌كا درێژ دبینیت، چه‌ند یا گرنگ ژی بیت ره‌نگه بتنێ بۆ دلێ نڤیسه‌ری گوله‌كێ یان لایكه‌كێ ل سه‌ر گۆتارا وی بده‌ت و لڤێره نڤیسه‌ر نه‌چار دمینیت گوهۆرینێ د شێوازێ خوه‌یێ نڤیسینێدا بكه‌ت و دڤێت ب كێمترین په‌یڤ بابه‌تێ خوه بگه‌هینیت و شرۆڤه‌كرن، ڤه‌جینا بابه‌تی و كا گۆتارا وی چه‌ند یا درێژه ئه‌ڤه نڤیسه‌رییا وی پیشاندده‌ت، ناخووت، به‌لكو خوانده‌ڤای ژێ دڤێت، ب كێمترین په‌یڤ، تشتێ هه‌ی ب ده‌ربرینه‌كا جوان بگه‌هینیت و لڤێره گه‌له‌ك نڤیسه‌ران شیاینه خوه دگه‌ل ڤان گوهورانكاریان بگونجینن و نه بتنێ ئه‌ڤه، به‌لكو سۆشیال میدیا و ئه‌رنترنێت بگشتی یا بۆ وان بوویه پێنگاڤه‌كا گرنگ كو به‌رهه‌مێ وان بگه‌هیته زێده‌ترین خوانده‌ڤا ل هه‌ر كوژیێ جیهانێ بیت، كو ل دووماهیێ ژی مه‌به‌ستا نڤیسه‌ری هه‌ر ئه‌ڤه‌یه، ئه‌و تشتێ ئه‌و دنڤیسیت باشترین خوانده‌ڤان بۆ هه‌بیت.
لدوور خوانده‌ڤای:
ئه‌گه‌ر د ده‌مه‌كی دا بۆ نڤیسه‌ری ده‌رباز ببیت و هه‌ر تشتێ وی نڤیسا بیت وه‌ك خوه بلاڤ ببیت و خوانده‌ڤایێ وی بتنێ خوانده‌ڤان بیت، ئێدی خوانده‌ڤا ژی بوویه به‌شه‌ك ژ نڤیسینێ، خوانده‌ڤا ل سه‌ر هه‌ر بابه‌تێ یان پۆستێ د سۆشیالێدا بلاڤ دبیت رادوه‌ستیت، ئێدی ل رۆلێ ره‌خنه‌گری ژی رادبیت و راسته راست كۆمێنتا خوه دنڤیسیت و دیتنا خوه ده‌رباره‌ی گۆتارێ یان پۆستی ده‌ردبریت و نه بتنێ ئه‌ڤه، به‌لكو گه‌له‌ك خوانده‌ڤایێن دی ژی یێن سۆشیالێ ل كۆمێنتا دزڤرن و ب ره‌نگه‌كی و دوویان دبنه پشكه‌ك ژ گۆتارێ، یان كو ئێدی تا نڤیسه‌ر گۆتاره‌كێ بلاڤدكه‌ت، نه‌چاره چه‌ندین جارێن دی ل گوتارا خوه بزڤریت و ل سه‌ر راوه‌ستیت و شنی ببلاڤ بكه‌ت.
