شۆرشا گولانێ وه‌چه‌رخانه‌كا هزری و سیاسی بوو
ئحسان ئامێدی
كوردستان یان نه‌مان
سه‌ركه‌فتن بۆ كوردستانا بریندار
(كوردستان مه‌یدانا دروستا خه‌باتێ یه.. جه‌ماوه‌رێ گه‌لێ مه، خه‌باتێ بكه‌ن و ژیوارێ نسكۆیێ ره‌ت بكه‌ن)
(گه‌لێ مه د تێكۆشین خه‌باتا خوه یا دویر و درێژ دا، بۆ چه‌ندین جاران روی ب روی پیلان و تێكڤه‌دانێن هۆڤانه‌ی یێن هێزێن شۆفینی و نه‌حه‌زان بوویه، ب پشته‌ڤانیا سه‌میانێن وان. و دگه‌ل وان هه‌می پیلانان گه‌لێ مه‌یێ قه‌هره‌مان هه‌مبه‌ری وان راوه‌ستایه ب پتر باوه‌ری و رژدی بۆ خه‌باتێ و داكۆكیكرنێ لسه‌ر بده‌ستڤه‌ئینانا مافێن خوه یێن نه‌ته‌وه‌یێن ره‌وا، بێی كو گوه ده‌نه قوربانیدانێن مه‌زن د رێیا بلندكرنا شیوازێن خه‌باتا شۆڕشگێری دا ل دویڤ كاودان و پێدڤیێن قۆناغێ).
(پارتی دیموكراتی كوردستان – سه‌ركردایه‌تییا كاتی، دوپات دكه‌ته‌ڤه كو دێ یا به‌رده‌وام بیت ل سه‌ر خه‌بات و هێلا خوه یا شۆرشگێری ل پێناڤا چه‌سپاندنا ئۆتۆنومییا راست و دروست بۆ كوردستانا ئیراقێ داكو گه‌لێ مه یێ كورد د چارچووڤه‌یی كۆمارا ئیراقێ دا ب هه‌می مافێن خوه یێن نه‌ته‌وه‌یی و ره‌وا شاد ببیت، كو ل پاشه‌رۆژی ببیته ئه‌گه‌رێ راگرتنا سیاسه‌تا قڕكرن و ڤه‌گوهاستن و عه‌ره‌بكرنێ).
ئه‌ڤه و زێده‌باری ده‌رئینانا نامیلكا رێبازا رزگاریخوازا نه‌ته‌وه‌یا كوردی و هه‌لسه‌نگاندنا شۆرشا ئه‌یلۆنێ و به‌رنامێ نویێ پارتی دیموكراتی كوردستان و هه‌ژده بریارێن كۆنفرانسا به‌رلینێ یا سالا ١٩٧٦.
ئه‌ڤه په‌یام و به‌رهه‌ڤیێن پارتیا دیموكراتیا كوردستانێ- سه‌ركردایه‌تیا كاتی بوون، بۆ شۆرشا پێشكه‌فتنخوازا گولانێ و هۆسا ده‌ستپێكر و گه‌شه‌كر.
خۆیایه هه‌ر شۆرشه‌كێ ئارمانج و كارنامه‌یا خوه هه‌یه دا بشێت هه‌بوون و به‌رده‌وامبوونا خوه بپارێزیت و پێشڤه‌به‌ت دا بگه‌هیته ئارمانجان، و ئه‌وا شۆرشا گولانێ ژ شۆرشێن دی جودا دكه‌ت ئه‌و وه‌رچه‌رخانه‌یا هزری و سیاسیا وێ بوو، كو خوه وه‌كه تیۆر نیشا ددا و تا راده‌كی كارپێ دكر و شیای ببیته شه‌نگسته‌یێ بله‌ز نویبوونه‌ڤه و گه‌شه‌بوونا پارتی و شۆرشێ.
شۆرش گوهۆرینه‌كا رهوریشالى یه، خه‌باتا هه‌مه‌جۆر ژبۆ رزگاریا نه‌ته‌وه‌یی ده‌ست پیى دكه‌ت و رزگاریا هزری و جڤاكی و ئابۆری دگه‌ل خوه هه‌لدگریت و چاكسازیی و گوهۆرینێ د هه‌ر تشته‌كى دا دكه‌ت دا گه‌شه‌یی و پێشڤه‌چوونێ دروست كه‌ت.
په‌یاما مللی یا پارتی، خه‌باتكرنه بۆ دامه‌زراندنا ده‌وله‌ته‌كا كوردی و حه‌تا ئه‌ڤ ئارمانجه بجهدهێت دی خه‌باتا شۆرشگێری یا به‌رده‌وامبیت.
شۆرش، خه‌بات و به‌رخودان و قوربانیدانه ژبوونا رزگاریا وه‌لاتی و ئازادیا ملله‌تی و گوهورینێن رهوریشالی د هه‌می بیاڤێن ژینداریێن جڤاكی دا.
شۆرشا پیشكه‌فتنخوازا گولانێ وه‌كو درێژه‌پێده‌را شۆرشا مه‌زنا ئیلۆنێ د بارودۆخه‌كێ ئالۆز و بزه‌حمه‌ت دا ل ژێر درووشمێ په‌یاما سه‌ركردایه‌تیا كاتی یا پارتی دیموكراتی كوردستان ئه‌وا ل ١٠ ێ كانوونا ئێكێ سالا ١٩٧٥ ده‌رئینای (كوردستان مه‌یدانا دروستا خه‌باتێ یه.. جه‌ماوه‌رێ گه‌لێ مه، خه‌باتێ بكه‌ن و ژیوارێ نسكۆیێ ره ت بكه‌ن)، ده‌ست پێ كر و ژ گه‌له‌ك گرێ و ئاسته‌نگان ده‌ربازبوو هه‌تا شیای ب سه‌رهه‌لدنا گه‌لێ كوردستانێ شاد ببیت و كوردستانا ئیراقێ رزگاركه‌ت و هه‌رێما كوردستانێ دامه‌زرینیت.
شۆرشا پێشكه‌فتنخوازا گولانێ..
شۆرشه‌كا قه‌پخوازیێ بوو دژی پیلانێن هه‌رێمایه‌تی و درندایه‌تیا داگیركه‌ران و سیاسه‌تێن شۆفینیست و سه‌ركوتكه‌ر.
شۆرشه‌كا رزگاریخوازا نه‌ته‌وه‌یا پێشكه‌فتنخواز بوو، باوه‌ری ب مافێن بریاردانا چاره‌نڤیسا گه‌لان هه‌بوو و خه‌بات دكر ژبوونا رزگاركرنا گه‌ل و وه‌لاتی و جڤاكی.
شۆرشه‌كا باوه‌ریی و هیڤی و ئومێدان بوو، گۆته دوژمن و نه‌یاران ئه‌م كوردین و یێن ماین و دێ مینین و به‌رده‌وام بین و پێشڤه‌چین.
شۆرشه‌كا گوهۆرینێن رهوریشالیێن سیاسی، روشه‌نبیری، له‌شكرى، جڤاكی، ئابۆری و دیبلۆماسی بوو.
شۆرشه‌كا پێشكه‌فتنخواز بوو خوه دگه‌ل نویاتی و پێشڤه‌چوونێ دگونجاند و كار بۆ پێشڤه‌چوونا جڤاكی دكر و پشته‌ڤانا هه‌ژار و بنده‌ست و ته‌په‌سه‌را بوو، دۆستا ملله‌تێن بنده‌ست و بزاڤێن ئازادیخوازێن گه‌لان بوو.
شۆرشه‌كا جڤاكی بوو، باوه‌ری ب دادپه‌روه‌ریێ و یه‌كسانیێ و پێكڤه‌ژیانێ و پێشكه‌فتنا جڤاكی و مافێن مرۆڤی هه‌بوو و جهێ هه‌می پێكهاتێن جڤاكێ كوردستانێ د ناڤ دا دكر و دابینكه‌را مافێن هه‌میان بوو.
شۆرشه‌كا دیموكراتیا شۆرشگێر بوو، فره‌پارتایه‌تی و هه‌ڤپه‌یمانیێن سیاسی و به‌ره‌یێن نیشتیمانی پێك دئینان و ئازادیا رێكخستنێن سیاسی و راده‌ربرینێ ده‌سته‌به‌ردكر.
شۆرشه‌كا ره‌وشه‌نبیری بوو، باوه‌ری ب تیۆرێن زانستی و شۆرشگێری هه‌بوو و هه‌ڤالێن خوه پێ په‌روه‌رده‌دكرن و كار پێ دكر.
پارتی ب بیروباوه‌ر و كار و سیاسه‌ت و بزاڤ و چالاكی و شۆرش و سه‌رهلدانێن خوه‌ڤه كۆمه‌كا تێگه‌هێن فه‌لسه‌فی و هزری و سیاسی و كریاری ئینانه د كوردستانێ دا و سه‌ره‌ده‌ری دگه‌لدا كر.
شۆرشا گولانێ شیا دۆست و دوژمنان ده‌ستنیشان كه‌ت و ده‌ستنیشانا پێگه‌یێ خوه د هه‌ڤكێشه‌یێن سیاسی ل ئاستێ ئیراقێ و ده‌ڤه‌رێ و جیهانێ دا بكه‌ت.
شۆرشا گولانێ شیا توره‌كا په‌یوه‌ندیێن كوردی و جیهانی چێكه‌ت و سوودی ژ تیۆرێن شۆرشگێر و سه‌ربۆرێن بزاڤێن ئازادیخواز ملله‌تێن جیهانێ ببینیت.
شۆرشا گولانێ خودان سه‌ركردایه‌تیه‌كا خۆراگر و شۆرشگێرا ژیر و وێره‌ك و دلسۆز و پێداگیربوو بوو ل سه‌ر رێبازا پارتی و بارزانی.
شۆرشا گولانێ ب سه‌رۆكاتیا سه‌روك مسعود بارزانی و ئیدریسێ جانه‌مه‌رگ بوو له‌و شیا بمینیت و گه‌شه‌یێ بكه‌ت تا گه‌هشتیه پتریا ئارمانجان.
گه‌لێ كوردستانێ گه‌له‌ك شۆرش و سه‌رهه‌لدان كرینه و گه‌له‌ك گوری و قوربانی داینه و هێشتا شۆرشا وی یا رزگاریخوازی یا به‌رده‌وامه و دێ به‌رده‌وام بیت تا رزگاركرنا كوردستانێ.
هه‌رێما كوردستانێ به‌رهه‌مێ وان شۆرش و سه‌رهه‌لدانایه یا ل قۆناغا شۆرشا ئیلۆنێ پنیاتێ پێ دانای و ل شۆرشا گولانێ ل سه‌ر ئاڤاكری و سه‌رهه‌لدان پێكری و هه‌رێما كوردستانێ دامه‌زراندی.
شۆرشا ئیلۆنا نیشتیمانی ب سه‌رۆكاتیا بارزانیێ نه‌مر و شۆرشا گولانا پێشكه‌فتنخواز هه‌ر ل سه‌ر رێبازا بارزانی ب سه‌رۆكاتیا رێزدار سه‌رۆك مسعود بارزانی مه‌زنترین قۆناغا خه‌بات و به‌رخودانا ملله‌تێ كورده و مه‌زنترین تۆمارا رویدانایه و مێژوویه‌كا پڕ سه‌روه‌ریا زیندیه، گه‌له‌ك ژ پشكدارێن وان بینه‌رێن زیندینه و بیردانكا وانا شۆرشێ یا پڕه ژ رویدان و سه‌پێهاتی و چالاكیان، خه‌بات و سه‌ربۆرێن خوه ب زارێ خوه دبێژن و هنده‌كان ژی كرینه نڤیسین و په‌رتووك و كتێبخانا كوردی پێ ده‌وله‌مه‌ندكریه.
بیره‌وه‌ریێن شۆرش و سه‌رهه‌لدانێن كوردستانێ گه‌له‌كن و هه‌ر سال ل رۆژێن وان ل بیر دئینین و زیندی دكه‌ین، وه‌كو ئه‌ركه‌كێ نیشتیمانی وهه‌ستكرنه‌كا نه‌ته‌وه‌یی و مافه‌كێ سروشتی و سه‌بۆره‌كا خه‌باتگێری و مێژوویه‌كا ملله‌تی، بۆماوه‌یا نفشه‌كی یه بۆ نڤشه‌كێ دی ب شێوازێن جۆراوجۆر دهێته ڤه‌گوهاستن.
شۆرشا گولانێ گه‌نجینه‌كا مه‌زنا بیروباوه‌ر و ره‌شه‌نبیری بوو، ریبازه‌كا ده‌وله‌مه‌ندا كلتۆرێ شۆرشگیری و گوهۆرینێ بوو نه‌خشه‌رێكه‌كا ته‌واوا رزگاركرن و ئاڤه‌دانكرنێ بوو.
شۆرشا گولانا پێشكه‌فتنخواز وه‌رچه‌رخانه‌كا هزری و سیاسی بوو د بزاڤ و شۆرشا رزگاریخوازا كوردستانێ دا.
ئه‌ڤا هه‌ی لسه‌ر بنگه‌هێ وێ هزرێ و سیاسه‌تێ و كار و بزاڤ و خه‌بات و قوربانیدانا وێ پێگه‌هشتیه.
ئها ئه‌ڤرۆ ژی ئه‌م پێدڤی پێگیری پێكرنێینه ب رێبازا پارتی و بارزانی و پرانسیبێن شۆرشا ئیلۆنێ و گولانێ ژبونا كوردستانه‌كا ئازاد و گه‌له‌كێ سه‌رفراز.
ئه‌ڤجا بلا ده‌ستكه‌فتیێن خه‌بات و قوربانیدانێ بپارێزین و گه‌شه‌یێ پێ بكه‌ین.
سلاڤ ل گیانێ شه‌هیدێن شۆرشا ٢٦ گولانا نشتیمانیا پێشكه‌فتنخواز و ته‌ڤایا شه‌هیدێن كوردستانێ و سه‌روه‌رێ شه‌هیدان بارزانیێ نه‌مر و ئیدریسێ جانه‌مه‌رگ..
سلاڤ ل زیندانیێن سیاسی یێن به‌رخودان ل زیندانێن فاشستان دا كرین.
سلاڤ ل پێشمه‌رگه‌یێن قه‌هره‌مان یێ به‌رێ گوله‌یێن چه‌كێ دایه سه‌نگه‌رێن دوژمنی و ژیانا خوه پێشكێشی سه‌رفرازیا كوردستانێ كری.
سلاڤ ل ئه‌ندامێن پارتی بن یێن چالاكی ل ناڤ جه‌رگێ دوژمنی دا دكرن و ترس و سه‌هم د ئێخسته ددلێ وان دا.
بژی پارتی .. بژی پێشمه‌رگه.. بژی ملله‌ت
