شۆره‌شا ئیلۆنێ چریسكه‌كا گه‌ش ل ســه‌ر ده‌مه‌كێ ره‌ش!

شۆره‌شا ئیلۆنێ كو ب مه‌زنترین و ب ده‌ستكه‌فتیترین شۆره‌شێن گه‌لێ كورد و كوردستانێ ب گشتى دهێته‌ نیاسین ئارمانجا وێ یا سه‌ره‌كى به‌رگریكرن ژ هه‌بوونا گه‌لێ كورد و مافێن وان یێن ره‌وا ل سه‌ر خاكا وان و ژلایه‌كێ دى ڤه‌ رابوویه‌ ب دژایه‌تیكرنا ئه‌وان بێ هیڤى و ئومێدێن د ناڤا گه‌لێ كورد دا په‌یدا بووین د ئه‌وان كاودانێن نه‌خۆش دا به‌رى دژایه‌تیكرنا خوه‌ بۆ سیسته‌مێ دكتاتۆرى و تاكره‌ویێ و پێشێلكرنا هه‌مى مافێن گه‌لێ كورد و داگیركرنا خاكا كوردستانێ دیار بكه‌ت كو ئه‌ڤه‌ ژى ئه‌ركه‌كێ گران بوو به‌لێ شیایه‌ هه‌ر زویكا گه‌لێ كورد ب گشتى و گه‌نجێ كورد ب تایبه‌تێ هشیار بكه‌ت كو هه‌ست ب هیڤى و ئومێدین ب پاشه‌رۆژه‌كا گه‌ش بكه‌ت وه‌ك ئه‌ڤرۆ به‌رهه‌مێ وێ یێ دیاره‌ له‌وما وه‌ك لاپه‌ره‌كێ زێرین كه‌فتیه‌ د ناڤا مێژوویا بزاڤا رزگاریخوازا گه‌لێ كورد دا و بوویه‌ شۆره‌شه‌كا سه‌رانسه‌رى كو دانپێدانێ ب سنوورێن ده‌ستكردێن كوردستانێ نه‌كه‌ت كو ئه‌ڤه‌ پێدڤیه‌كا زۆرا گرنگا وى سه‌رده‌مى بوویه‌. ژ ده‌ستكه‌فت و سه‌ركه‌فتنێن شۆره‌شێ كو شیایه‌ د نه‌خۆشترین كاودان دا په‌نایێ بۆ چ كارێن نه‌یاسایى و تێكده‌رانه‌ و تیرۆر و توقاندنێ نه‌به‌ت.
هه‌روه‌سا ب حیكمه‌تا بارزانیێ نه‌مر و سه‌ركردایه‌تیا شۆره‌شێ رێك نه‌هاته‌ دان كو شه‌رێ دو نه‌ته‌وه‌یى په‌یدا بیت د ناڤبه‌را نه‌ته‌وێ كورد و عه‌ره‌بان دا، به‌لكو ئارمانجا شۆره‌شێ ب ده‌ستڤه‌ ئینانا مافێن گه‌لێ كورد و كوردستانێ بوویه‌ ل سه‌ر خاك و ئاڤا وان و ل ژێر درووشمه‌كێ پـر مانا و یاسایى ل وى سه‌رده‌مى كو ئه‌و ژى دیموكراسیه‌ت بۆ عیراقێ و مافێ ئۆتۆنۆمى بۆ گه‌لێ كورد، چونكى د باوه‌ریا بارزانیێ نه‌مر دا چ گه‌ل و نه‌ته‌وه‌ ب مافێن خوه‌ یێن ره‌وا شاد نابن ئه‌گه‌ر ل ژێر سیسته‌مه‌كێ تاكره‌ویى و تایفى و دكتاتۆریه‌تێ دا بژین كو هه‌تا ئه‌ڤرۆ ژى عیراقێ پێدڤى ب ئه‌وێ دیموكراسیه‌تێ هه‌یه‌ ئه‌وا بوویه‌ درووشمێ شۆره‌شا ئیلۆنێ به‌لێ گه‌لێ كورد چ پێدڤى ب ئۆتۆنۆمیێ نه‌مایه‌ و ئه‌ڤ قووناغه‌ بۆراندیه‌ ب تایبه‌تى پشتى مه‌زنترین كاره‌سات ب سه‌ر گه‌لێ كورد دا هاتین وه‌ك قووناغێن ئه‌نفالكرنا گه‌لێ كورد و بێ سه‌روشینكرنا سه‌د و هه‌شتێ و دو هزار وه‌لاتیێن كورد و كیمابارانكرنا ده‌ڤه‌رێن جودا جودا یێن كوردستانێ و تالانكرن و وێرانكرنا ب هزاره‌ها گوند و باژێرێن كوردستانێ له‌وما داخوازیێن گه‌لێ كورد ژ قووناغێن فیدالیه‌تێ و كۆنفیدرالیه‌تێ ژى پتر لێ هاتن وه‌ك مافه‌كێ ره‌وا به‌رامبه‌ر ئه‌وان هه‌مى قوربانیێن هاتینه‌ دان پێخه‌مه‌ت ب ده‌ستڤه‌ئینانا مافێن خوه‌ و رزگاركرنا خاكا كوردستانێ ژ هه‌ر دوژمن و داگیركه‌ره‌كى و ئه‌ڤرۆ ژى ئارمانجا هه‌ره‌ گرنگا گه‌لێ كورد و كوردستانێ ب گشتى و ئارمانجا سه‌ره‌كى یا سه‌رۆكێ كوردستانێ ب تایبه‌تى سه‌ربخۆیا كوردستانێ یه‌ كو ئه‌ڤرۆ ژ هه‌ر قووناغه‌كا بۆرى پـتر گه‌لێ كوردستانێ ئه‌ڤێ ئارمانجێ ب مافێ خوه‌ یێ ره‌وا دبینیت و كار بۆ دهێته‌ كرن.

کۆمێنتا تە